Kina rikthehet në rajon – Samiti “16+1” do të mbahet të Mërkurën në Kroaci, takohen liderët e Ballkanit

Ditën e Mërkurë do të zhvillohet në Kroaci samiti i 8-të mes Kinës dhe vendeve të Europës Qendrore dhe jug-lindore, i njohur ndryshe si 16+1.

I pranishëm në Kroaci gjatë zhvillimeve të samitit do të jetë edhe kryeministri kinez Li Keqiang si dhe liderët e vendeve që janë pjesë e iniciativës. Mes tyre janë edhe 5 vendet e Ballkanit Perëndimor, Kosova e përjashtuar. I pranishëm gjatë punimeve të samitit, ashtu si edhe vitet e tjera, do të jetë edhe kryeministri i Shqipërisë. Shqipëria është i vetmi vend i rajonit ku rezulton se Kina ka zero para të investuara.

Këtë gjë e thonë shifrat mjaft mirë. Ky ndoshta mund të sjellë një ndryshim në këtë drejtim, sidomos në infrastrukturë, ku edhe janë të fokusuara investimet kineze, por edhe ku Shqipëria ka më shumë nevojë. Samiti i këtij viti pritet me interes të veçantë, pasi Kina po rishikon strategjinë e saj në Europë, ndërkohë që Bashkimi Europian ndihet i rrezikuar nga depërtimi i Pekinit zyrtar në kontinentin e vjetër nëpërmjet Ballkanit.

Samiti i parë 16+1 u mbajt në Poloni, ndërkohë që këtë vit radhën e ka Kroacia.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.