Kina ul tarifat për makinat në 15% – Përfitimet pritet të ndihen jo vetëm për prodhuesit amerikanë
Kina do të ulë tarifat në importe të makinave për pasagjerë në 15%, duke ofruar një mundësi për prodhues si BMW dhe Ford, ndërkohë që kërcënimi i luftës tregtare me SHBA po tërhiqet. Ministria e Financave bëri të ditur se ulja e tarifave nga niveli aktual prej 25%, do të bëhet efektive nga data 1 Korrik, duke hequr një barrierë që ka zgjatur për më shumë se 1 dekadë. Ulja e tarifave në importe vjen pas një dakordësie mes administratës së Donald Trump dhe zyrtarëve kinezë për të zbutur tensionet tregtare.
Ndërkohë që ky lajmërim shihet si një dorëlëshim ndaj Trump dhe do të ofrojë mundësi për prodhues amerikanë si Tesla, ulja e tarifave do të jetë përfituese edhe për kompanitë europiane dhe aziatike si Daimler dhe Toyota. Vlera në treg e Land Rover, Tata dhe BMW u rritën gjithashtu pas lajmërimit. Kjo lëvizje vjen paralelisht me lajmërime të tjera të ngjashme nga Kina që tregojnë angazhimet e vendit për të hapur ekonominë ndaj botës.
Pekini ka premtuar të ulë limitet e zotërimit në sektorin e makinave dhe atë bankar. Për pjesët e makinave, tarifat do të ulej me 6%, sipas ministrisë së Financave. Kina ka importuar 1.22 milionë automjete gjatë vitit të kaluar, që zë rreth 4.2% të shitjeve totale të vendit prej 28.9 milionë. Prej rreth 51 miliardë dollarë importe të makinave në 2017-ën, 13.5 miliardë erdhën nga Amerika e Veriut, përfshirë modelet e prodhuara nga kompani jo-amerikane si BMW.
Ulja e barrierës doganore do të kontribuojë te prodhuesit e makinave luksoze si Tesla, që nuk kanë fabrika të prodhimit në Kinë. Lideri në shitje i makinave luksoze, Audi, ka prodhuar në Kinë që prej viteve 90. Kjo kategori e makinave do të ndiejë më shumë efektet e uljes së tarifave, për shkak se një pjesë e vogël e prodhimit është zhvendosur në Kinë. Për markën Lexus të Toyota, përfitimet do të jenë të mëdha, për shkak se është e vetmja markë japoneze që nuk prodhon në Kinë dhe nuk planifikon.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.