Kishte fituar në mënyrë të paligjshme mbi 1.3 milionë euro – Ish-kryeministri i Maqedonisë së Veriut dënohet me 7 vite burg për pastrim parash

Ish-kryeministri i Maqedonisë së Veriut, Nikola Gruevski, është shpallur fajtor për pastrim parash nga fondet e partisë.

Gjykata Penale në Shkup vendosi se Gruevski kishte fituar në mënyrë të paligjshme mbi 1.3 milionë euro nga donacionet për partinë e tij nga viti 2006 deri në vitin 2012, pjesë e kohës kur ai ishte në detyrë.

Gjyqtarët zbuluan gjithashtu se Gruevski kishte përdorur donacionet e partisë për të blerë prona përmes një kompanie offshore të regjistruar në Belize.

51-vjeçari, i cili prej tre vitesh jeton në Hungari, u dënua në mungesë me shtatë vjet burg.

Gruevskit iu dha azil politik në Hungari pasi u dënua për akuza të veçanta në Maqedoninë e Veriut në vitin 2018.

Ai gjithmonë e ka mohuar keqbërjen dhe avokatët e tij mbrojtës thanë se do të apelonin vendimin e fundit.

Katër nga bashkëpunëtorët e Gruevskit u dënuan gjithashtu në rastin e fondeve të partisë, përfshirë kushëririn e tij Saso Mijalkov, ish-kreu i shërbimit inteligjent të vendit.

Gjykata urdhëroi gjithashtu konfiskimin e pronave të ndryshme, përfshirë banesat luksoze në Shkup.

Si kërkoi azil ish-kryeministri i IRJ të Maqedonisë në Hungari

Gruevski u dënua për herë të parë në vitin 2018 me akuzat për ndikim të paligjshëm mbi zyrtarët e ministrisë së brendshme për blerjen e një makine të blinduar luksoze Mercedes. Ai u dënua me dy vjet burg, por u arratis në Hungari para arrestimit.

Në vitin 2020, ish-kryeministri u dënua edhe me 18 muaj burg për orkestrimin e dhunës në vitin 2013.

Gruevski, i cili shërbeu si kryeministër nga 2006 në 2016 po përballet me tre raste të tjera për korrupsion të dyshuar, parregullsi zgjedhore dhe shpërdorim detyre.

Të gjitha akuzat lidhen me një skandal përgjimi të vitit 2015, kur doli se bisedat telefonike të më shumë se 20,000 njerëzve, përfshirë politikanë, gjyqtarë, policë, gazetarë dhe diplomatë të huaj ishin regjistruar në mënyrë të paligjshme.

Skandali shkaktoi zgjedhje të parakohshme në vitin 2016, në të cilat partia VMRO-DPMNE e Gruevskit humbi nga lideri socialdemokrat Zoran Zaev.

Autoritetet në Maqedoninë e Veriut i kanë kërkuar pa sukses Hungarisë që të ekstradojë ish-udhëheqësin nacionalist.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.