Klosi: Çdo drejtor që nuk u përgjigjet qytetareve do të largohet nga puna
Drejtorët që nuk u përgjigjen qytetarëve do të largohen nga puna. Kështu është shprehur ministri i Turizmit dhe Mjedisit, Blendi Klosi nga turi I llogaridhënies në bashkinë e Urës Vajgurore, i cili ka deklaruar se administrata është nën vëzhgimin e qytetarëve.
Klosi u ka kërkuar qytetarëve të denoncojnë çdo rast korrupsioni apo problem lidhur me administratën në platformën e bashkëqeverisjes.
“Problemet që keni ngrijini në platformë, do të merrni një përgjigje, dikush do vihet në lëvizje . Në qoftë se problemi nuk ka marrë përgjigje sepse ai punonjës ka qenë i korruptuar do të largohet nga puna nëse ai punonjës ka qenë neglizhent ai do të këshillohet që të mos jetë më neglizhent, në qoftë se problemi nuk ka marrë zgjidhje se zgjidhja që ju kërkoni, do t’ju thuhet që ajo zgjidhje nuk jepet por do të keni një përgjigje zyrtare pse kërkesa juaj nuk është zgjidhur ashtu siç ju e mendoni”, u shpreh Klosi.
Më tej, Klosi vuri theksin te mundësitë e zhvillimit në zonën e Urës Vajgurore, sipas të cilit nevojitet më shumë shpejtësi për të krijuar modele agroturzimi.
“Na duhet më shumë shpejtësi që në Urën Vajgurore të krijojmë modele të agroturizmit, për prodhimet e shkëlqyera dhe kulinarinë e kësaj zone për të pasur mundësi që të punojmë me kryetaren e bashkisë për të dhënë modelet e para që këto të shërbejnë si model për të zhvilluar zonën, por duhet të gjejmë arsye që shumë grupe turistësh që shkojnë e vizitojnë kalanë e Beratit, të ndalojnë në Urën Vajgurore dhe të vizitojnë Dimalin dhe bukuritë e zonës rurale”, shtoi më tej ministri.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.