KLSH çon në Prokurori 62 zyrtarë, 6 kallëzime në SPAK – Raporti: Në hetim për veprime abuzive apo mashtrim financiar me pronën publike!

62 zyrtarë janë kallëzuar penalisht nga Kontrolli i Lartë i Shtetit për shkelje e abuzime me detyrën, 6 prej të cilëve janë dërguar për hetim në Strukturën e Posaçme Antikorrupsion. E dhëna vjen përmes raportit të punës për vitin 2021 i sapo bërë publik, ku KLSH bën me dije se kallëzimet janë bërë në kuadër të angazhimit për të luftuar veprimet abuzive dhe të mashtrimit financiar me pronën publike. Specifikisht, KLSH-ja ka përcjellë në organet kompetente 14 kallëzime dhe indicie penale, 6 prej tyre në SPAK dhe 8 të tjera pranë Prokurorive të rretheve gjyqësore, për 62 zyrtarë të niveleve të ndryshme.

Vlen të theksohet, sipas Kontrollit të Lartë të Shtetit se gjatë vitit 2021 janë të shumta vendimet gjyqësore të cilat konfirmojnë rekomandimet e lëna nga KLSH në subjektet e audituar. Në proceset gjyqësore të tilla, KLSH ka insistuar në monitorimin e zbatimit të rekomandimeve, arkëtimit të dëmit dhe parandalimit të efekteve negative financiare.

Kontrolli i Lartë i Shtetit ka konstatuar gjatë vitit të shkuar një dëm ekonomik dhe të ardhura të munguara në Buxhetin e Shtetin me vlerë shumë të lartë prej rreth 740 milionë dollarë. Pjesa më e madhe e e kësaj shume i takon efekteve negative e të ardhurave të munguara në buxhetin e shtetit, që prekin shumën totale prej 55.4 miliardë lekësh, afërisht 550 milionë dollarë. Pjesa tjetër prej 19.1 miliardë lekësh, apo afërisht 190 milionë dollarë është konstatuar në  formën e pastër të dëmit ekonomik.

Pjesa më e madhe e dëmit të konstatuar i përket abuzimeve me shpenzimet buxhetore, ku pjesa më e madhe e dëmit ekonomik është zbuluar në fushën e investimeve.  Për shkak të abuzimeve në investime, të ardhurat e munguara në buxhetin e shtetit vlerësohen nga KLSH në një total prej 25.2 miliardë lekësh, apo rreth 250 milionë dollarë.  2.4 miliardë lekë, apo rreth 24 milionë dollarë efekte negative në arkën e shtetit, janë konstatuar me shpenzimet që lidhen me pagat e shpërblimet e administratës publike, ndërkohë që nuk mbeten pas as dëmet ekonomike në fushën e shpenzimeve operative, ku totali arrin në 1.3 miliardë lekë, afërisht 13 milionë dollarë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.