KLSH kallëzime për 1 mbikëqyrës punimesh e 3 funksionarë të pushtetit vendor!  Parregullsi me investimet e tenderat

Kontrolli i Lartë i Shtetit ka kallëzuar në prokurori një mbikëqyrës punimesh në Bashkinë Ura Vajgurore pasi ka konstatuar një dëm ekonomik në vlerë 2 milion lekë.

“Gjatë auditimit u konstatuan shkelje dhe parregullsi të dispozitave ligjore në fuqi në fushën e zbatimit të punimeve të ndërtimit, për procedurën e prokurimit “Rehabilitim, Ndriçim, Gjelbërim i Shëtitores të Lagjes 18 “Tetori”, ndër të cilat më kryesoret janë:

– Mos përmbushje të detyrës të ngarkuar dhe favorizim të sipërmarrësit të punimeve nëpërmjet deklarimit/situacionimit të punimeve fiktive të kryera në kontratën shtesë dhe përfitim të pa drejtë (punime të pakryera) për shoqërinë zbatuese të punimeve në vlerën prej 1,997,259 lekë pa TVSH;

– Mangësi të theksuara në dokumentacion tekniko-ligjor të dosjes të investimit (dokumente fiktive dhe që nuk pasqyrojnë realitetin), në kundërshtim me ligjin nr. 8402, datë 10.09.1998 “Për Kontrollin dhe Disiplinimin e Punimeve të Ndërtimit”, me Udhëzimin nr. 2 datë 13.05.2005 “Për zbatimin e punimeve të ndërtimit” dhe me Udhëzimin nr. 1, datë 16.06.2011 “Për mbikëqyrjen dhe kolaudimin e punimeve të ndërtimit”.  Për këto shkelje dhe për të tjera, KLSH ka kryer pranë Prokurorisë së Rrethit Gjyqësor Berat, me shkresën nr. 259/22 datë 08.07.2017 kallëzim penal ndaj E.C. në cilësinë e mbikëqyrësit të punimeve, për konsumimin e elementëve të veprës penale të “Shpërdorimit të detyrës”, parashikuar nga neni 248 i Kodit Penal” njofton KLSH.

KLSH, me qëllim përmirësimin e situatës i ka rekomanduar Bashkisë Ura Vajgurore masa me karakter organizativ në lidhje me eleminimin e praktikave që kanë sjellë impakt negativ në buxhet, kryesisht në fushën e tatim taksave, në vlerën 200 milion lekë.

Po ashtu, Kontrolli i Lartë i Shtetit ka kallëzuar penalisht edhe komisionin e vlerësimit të ofertave të ish-komunës Dermenas në Fier. Dëmi i konstatuar është 3 milionë lekë ndërsa impakti negativ në të ardhurat e buxhetit, 11.6 milion lekë.

“Gjatë auditimit u konstatuan shkelje dhe parregullsi të dispozitave ligjore në fuqi në fushën e prokurimit publik, në vlerësimin e ofertave ekonomike duke vepruar me dy standarte vlerësimi dokumentacioni për procedurën e prokurimit “Riveshje e dy rrugëve paralele Hidrovor-Bregdet dhe hapje traseje për rrugë paralele me bregdet”, ndër të cilat më kryesoret janë: – Është shkaktuar një dëm ekonomik në vlerën prej 3,085,240 lekë pa TVSH, për  skualifikimin e padrejtë të Operatorit Ekonomik me ofertë me vlerë më të ulët, në kushtet kur Operatori Ekonomik ka plotësuar kërkesat e Dokumenteve Standarde të Tenderimit;  – Janë kryer veprime me efekt negativ në Buxhetin e Shtetit për vlerën 11,574,650 lekë, shkaktuar nga kualifikimi dhe shpallja fitues e Operatorit Ekonomik me ofertë më të lartë, në kushtet kur nuk ka plotësuar kriteret për kualifikim sipas Dokumenteve Standarde të Tenderimit.  Për këto shkelje dhe për të tjera, KLSH ka kryer pranë Prokurorisë së Rrethit Gjyqësor Fier, ndaj D.B. me funksion ish-Përgjegjës i Zyrës së Administrimit dhe Mbrojtjes së Tokës, në cilësinë e Kryetarit të Komisionit të Vlerësimit të Ofertave(KVO), në ish Komunën Dërmenas, Fier; J.S. me funksion Specialist Finance, në cilësinë e anëtarit të KVO në ish Komunën Dërmenas, Fier dhe K.B. në cilësinë e anëtarit të KVO në ish Komunën Dërmenas, Fier, për konsumimin e elementëve të veprave penale “Shkelja e barazisë së pjesëmarrësve në tender apo ankande publike” dhe “Shpërdorimit të detyrës” “ njofton KLSH.

KLSH, me qëllim përmirësimin e situatës i ka rekomanduar Bashkinë Fier masa me karakter organizativ në lidhje me eleminimin e praktikave që kanë sjellë impakt negativ në buxhet, kryesisht në fushën e tatim taksave, në vlerën 1.1 miliard lekë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.