KLSH: Shkelje me tenderët e Pandemisë – Parregullsi në përzgjedhjen e kompanive fituese, u kontraktuan pa konkurrim

Negociimi i drejtëpërdrejtë i kontaratave dhe shmangia e tenderave të hapur ka qenë një prej problemeve më të rënda që kanë shoqëruar procedurat e blerjes së produkteve për të përballuar efektet e Pandemisë Covid 19.

Në raportin e sapopubikuar të punës për vitin 2021, Kontrolli i Lartë i Shtetit bën me dije se në auditimin e fondeve për përballimin e pandemisë COVID-19, gjatë kryerjes së procedurave të prokurimit, janë konstatuar pasoja me dëm ekonomik, efekte negative në përdorimin e fondeve publike, mungesë efektiviteti, eficiencë dhe ekonomiciteti në realizimin e procedurave prokuruese për përballimin e situatës; likuidimi i shërbimeve të kryera, pa zhvilluar procedura të prokurimit publik; janë shpallur fitues operatorë ekonomikë në kundërshtim me rregullat e prokurimit publik; nuk janë planifikuar struktura monitoruese për zbatimin e kontratave; nuk është argumentuar teknikisht dhe ligjërisht vendosja e kërkesave të veçanta për kualifikim dhe specifikimeve teknike, dhe që në disa raste nuk kanë lidhje me natyrën dhe përmasat e objektit të prokurimit; janë marrë angazhime financiare pa pasur fonde në dispozicion; mos hartim dhe raportim në Degën e Thesarit të ndryshimeve të regjistrit të parashikimeve të prokurimeve publike; mos dokumentim nga ana e komisioneve të marrjes në dorëzim të mallrave të datave të  skadencës, pasi janë konstatuar mallra të lëvruara në tejkalim të afateve të skadencës etj.

Për furnizimet me mallra anti Covid, nënvizon Kontrolli i Lartë i Shtetit, është vijuar me procedura prokurimi të drejtpërdrejta dhe jo procedura prokurimi sipas ligjit të prokurimin publik; si pasojë e procedurave të përzgjedhura si dhe vakumeve ligjore të VKM nr. 203, datë 26.02.2020 “Për procedurat që përdoren për lidhjen e kontratave që diktohen nga interesa thelbësore të shtetit” i ndryshuar, disa procedura rezultuan jo efektive, duke mos siguruar pajisjet mjekësore e domosdoshme për situatën Covid 19 (siç janë respiratorët), apo duke sjellë dështimin e disa procedurave; si pasojë e furnizimit të vonuar dhe/ose mos furnizimit për kontratat publike, janë konstatuar të ardhura të munguara në buxhetin e shtetit nga mos llogaritja e penaliteteve dhe mos mbajtja e sigurimit të kontratës etj.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.