KLSH sulmon Autoritetin Kombëtar të Ushqimit – “Nuk arrin të garantojë sigurinë ushqimore në vend”

Kontrolli i Lartë i Shtetit deklaroi të hënën se ka konstatuar një sërë shkeljesh nga ana e AKU, të cilat cënojnë sigurinë ushqimore, si edhe jetën ekonomike dhe sociale në vend.

KLSH i referohet gjetjeve të auditimit të performancës të Autoritetit Kombëtar të Ushqimit për periudhën Janar 2012- Dhjetor 2016. Parregullsitë prekin një numër të madh fushash nga veprimtaria e këtij institucioni, që nisin nga kuadri legjislativ e shkojnë deri tek inspektimet e mosvjelja e gjobave, ku KLSH ka zbuluar prirjen për të ulur numrin dhe vlerën e tyre.

Nëse në vitin 2013 janë vjelur 68% e gjobave, për vitin 2016 kjo vlerë është tre herë më e ulët. Kjo është e lidhur drejtpërdrejt me veprimtarinë e sektorit juridik, veçanërisht përmes shërbimit përmbarimor.

Në rajone si Tirana dhe Vlora asnjë gjobë nuk paguhet vullnetarisht, ndërsa përqindja e paguar vullnetarisht në të gjithë vendin është 2.6%.

Ndër zbulimet e tjera më të rëndësishme të raportit përfshihen edhe pikat e mëposhtme:

• Luhatjet më të theksuara të inspektimeve vjetore vërehen veçanërisht në sektorët për produktet me origjinë shtazore dhe joshtazore, pikërisht në dy sektorët me riskun më të lartë në sigurinë ushqimore
• AKU nuk ka arritur të ketë numrin e inspektorëve të përcaktuar në organikë për 8 persona, duke ndikuar në një numër më të vogël inspektimesh dhe për pasojë në sigurinë ushqimore, që në këtë mangësi përfshihet dhe Departamenti i Administratës Publike.
• Ka një numër të konsiderueshëm inspektorësh, profesioni i të cilëve nuk ka lidhje me fushën e sigurisë ushqimore që ata kanë objekt kontrolli: Inspektorët në AKU rezulton se kanë pasur trajnime sporadike, si dhe kanë munguar kryesisht dhe veçanërisht temat për inspektimin dhe inspektorët nuk i janë nënshtruar testimit profesional fillestar.
• Rezultatet e analizave tregojnë se përmirësimi i sigurisë ushqimore në vend është i kufizuar, pasi me treguesit e analizave jo konform me standardet, pra të ushqimeve të dëmshëm për shëndetin, ka luhatje të theksuar. Në vitin 2012 kanë rezultuar 3.8 % e mostrave me tregues jashtë standardit, zbresin në 1.8 % në vitin 2015 dhe ngrihen në 2.8 % në 2016.
• Në periudhën 2012-2016, kanë rezultuar jo konform standardeve mesatarisht 34.4 % e analizave të shëndetit dhe mirëqenies së kafshëve, aq më keq që ka një prirje në rritje të konsiderueshme mbi 5 herë.
• Pajisjet laboratorike janë të shpërndarë në 12 rajone, ndërkohë që personeli i tyre është vetëm në 7 prej tyre, duke sjellë që një sasi dhe vlerë e konsiderueshme të mos përdoren dhe gradualisht të humbasin cilësitë e funksionimit për shkak të kushteve të ruajtjes.
• Mungon gjurmueshmëria për produktet bimore dhe frutore të vendosura në treg, si dhe kryerja e analizave përkatëse, duke rrezikuar konsumimin e tyre me mbetje minerale dhe pesticide, pasi nuk janë objekt inspektimi gjatë fazës së prodhimit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.