Kohët e reagimit të ambulancave– Në Shqipëri vonohen 2 herë më shumë se në Europë
Gjatë këtij viti koha e përgjigjes e urgjencës në zonat urbane është ulur në 18 minuta, nga 20 minuta vitin e shkuar. Kjo është meritë pjesërisht e shtimit me 20% të numrit të ambulancave aktive dhe shtimit të 1 helikopteri në Shërbimin e Urgjencës.
Ndërkohë, në zonat interurbane, shpejtësia e reagimit shkoi në 43 minuta, nga 45 minuta që ishte deri para një viti.
Në planet për vitin 2018, Ministria e Shëndetësisë synon ta ulë më tej kohën e reagimit, duke e çuar në 16 minuta në qytet dhe në 43 minuta për zonat jashtë qyteti.
Pavarësisht citimit të këtyre treguesve si arritje të shëndetësisë dhe statusit të prioritetit për vitin e ardhshëm, ambulancat në Shqipëri janë ende shumë larg standardeve perëndimore.
Siç tregohet edhe në tabelën e mëposhtme, edhe nëse Shqipëria arrin vërtetë të ulë kohën e reagimit në 16 minuta, ajo do të jetë përsëri dy herë më e ngadaltë se në pjesën më të madhe të kontintentit europian.
Vendi | Koha e reagimit (min:sek) |
Kopenhagen, Danimarkë | 04:45 |
Bonn, Gjermani | 07:59 |
Genoa, Itali | 08:00 |
Midlandsi Perëndimor, Mbretëria e Bashkuar | 08:00 |
Richmond, SHBA | 08:59 |
Ulleval, Norvegji | 09:39 |
Mbretëria e Bashkuar | 08:00 |
SHBA | 08:59 |
Kanada | 08:59 |
Ndërkohë, në vende të tjera të Europës, koha e reagimit është një standard detyrues më tepër se sa indikator i performancës. Shumë shtete kanë caktuar një kohë brenda së cilës ambulanca duhet të gjendet tek dera e pacientit në rast të situatave kritike ku rrezikohet jeta, pavarësisht zonës ku ai banon.
Vendi | Koha e reagimit (min:sek) |
Republika Çeke | 20:00 |
Estoni | 15:00 |
Gjermani | 5:00 |
Hungari | 15:00 |
Irlandë | 08:00 |
Letoni | 11:00 |
Lituani | 15:00 |
Holandë | 15:00 |
Norvegji | 12:00 (urbane) 25:00 (rurale) |
Spanjë | 08:00 |
Turqi | 10:00 |
Mbretëria e Bashkuar | 08:00 |
Siç duket qartë, koha mesatare e reagimit në Shqipëri është më keq se ajo maksimale e reagimit në vende të tjera. Standardi i mësipërm është arritur prej shteteve të ndryshme duke rritur buxhetin për kujdesin ambulancor, i cili varion nga 25-100 milionë euro në vit, ose 2.78 miliardë euro në rastin e Mbretërisë së Bashkuar dhe 5 miliardë euro në rastin e Norvegjisë.
Megjithatë duhet thënë se shumë ekspertë nuk e konsiderojnë kohën e reagimit si treguesin më të mirë të performancës së këtij shërbimit. Kjo pasi një kohë kaq të shpejtë e kërkojnë vetëm rastet arresteve kardiake, të cilat janë të pakta në përqindjen totale të kërkesave për urgjencë.
Sipas Matt Zavadsky, Drejtorit të Shërbimit për Operacionet e Urgjencës MedSTAR në SHBA, një “mjek i ndihmës së shpejtë pa eksperiencë mund të bëjë më shumë dëme se koha e reagimit e ambulancës”. Por për të vlerësuar shëndetësinë shqiptare në këtë tregues, mungojnë ende të dhënat.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.