Kolapsi i shitjeve të makinave ruse një shans për Kinën?!
Shitjet e makinave në Rusi ranë me pothuajse dy të tretat në mars, pasi lufta në Ukrainë, sanksionet perëndimore dhe një eksod i bizneseve të huaja shkaktuan ‘kërdinë’ në ekonominë e vendit. Vetëm 55,000 makina të reja dhe automjete të lehta komerciale u shitën në Rusi muajin e kaluar, 63% më pak nga marsi 2021, sipas të dhënave të publikuara të mërkurën nga Shoqata e Biznesit Europian (AEB), një grup që përfaqëson investitorët e huaj në Rusi.
Të gjitha markat – europiane, amerikane dhe aziatike – pësuan humbje, por më e goditura midis shitësve të mëdhenj ishte Volkswagen, shitjet e të cilit ranë me 74%, e ndjekur nga marka Škoda e grupit gjerman dhe Toyota (TM). Në shkurt, shitjet e përgjithshme ranë vetëm 4.8%, treguan të dhënat e shoqatës. Lexus, marka luksoze e Toyota-s, gjithashtu mori një goditje të rëndë: Shitjet ranë 91%, më së shumti nga çdo markë. Porsche, gjithashtu pjesë e grupit Volkswagen (VLKAF), pati rënie të shitjeve me 73%.
Rënia e rublës e shtyu gjithashtu çmimin mesatar të një makine të re në Rusi me 35% në 45% në mars, sipas faqes së internetit të analitikës së tregut rus të makinave Autostat. Investimi në një makinë të re ka të ngjarë të bjerë poshtë në listën e prioriteteve të shumicës së rusëve. Që nga pushtimi, inflacioni vjetor në Rusi është rritur në gati 16%, raportoi Reuters. Çmimi i mallrave bazë, përfshirë sheqerin dhe domatet është rritur dhe ka pasur raporte për mungesa në supermarkete pas një vale blerjesh paniku.
Një mundwsi për Kinën?
Modelet e makinave vendase si Lada në pronësi të AvtoVAZ – një ikonë e vetëbesimit të epokës sovjetike – mund të përfitojnë teorikisht nga mungesa e konkurrencës së huaj. Por sanksionet kanë bllokuar zinxhirët e furnizimit, duke çuar në një mungesë të rëndë të pjesëve. Kompania ka sjellë një pushim veror në të gjithë kompaninë deri në prill dhe ka njoftuar se do të kalojë në një javë 4-ditore për tre muaj nga qershori, në përpjekje për të shpëtuar vendet e punës të më shumë se 40,000 punonjësve. Kompania thotë se po dizajnon gjithashtu versione të reja të disa modeleve Lada për të qenë më pak e varur nga pjesët e importuara.
Prodhuesit kinezë të makinave mund të përfitojnë nga largimi i markave perëndimore, tha Carol Thomas, analiste e Evropës Qendrore dhe Lindore në kompaninë konsulente LMC Automotive. “Markat kineze pa dyshim do ta shohin situatën aktuale si një mundësi dhe ka një shans që më shumë të kërkojnë të krijojnë një bazë prodhimi rus në të ardhmen,” tha ajo. Great Wall Motors dhe Geely të Kinës panë rritje të fortë të shitjeve në Rusi gjatë tremujorit të parë në tërësi dhe pësuan humbje më të ngushta se rivalët perëndimorë në mars. CNN
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.