Kolektori në Gjirin e Lalëzit ‘gati’ në Maj – Balluku inspekton punimet: Projekti duhet të implementohet në të gjitha zonat bregdetare

Kolektori i ri në Gjirin e Lalëzit pritet të jetë funksional gjatë muajit maj. Këtë e ka bërë të ditur ministrja e Infrastrukturës dhe Energjisë, Belinda Balluku, e cila ka inspektuar punimet së bashku me zv.ministrin, Hantin Bonati si dhe drejtorin e Ujësjellës-Kanalizimeve, Spartak Kovaçi.

Ndërsa vlerësoi këtë investim si një zgjidhje afatgjatë dhe profesionale, Balluku shtoi se një projekt i tillë duhet të implementohet edhe në zona të tjera bregdetare.

“Është shumë e rëndësishme që ne të njoftojmë menjëherë që gjatë muajit maj impianti do të jetë i gatshëm për të nisur operimet e plota kështu që të gjitha subjektet që ndodhen në zonë të fillojnë të marrin masa për të bërë lidhjen me këtë kolektor”.

Ndërkohë, kreu i Ujësjellës Kanalizimeve, Kovaçi deklaroi se rrjeti i kanalizimeve do të përfundojë plotësisht brenda sezonit veror.

“Për dy muaj do të përfundojë komplet rrjeti i kanalizimeve dhe impianti do të merret në dorëzim dhe që nga ai moment ato mund të lidhin të gjitha resortet dhe bizneseve që janë bregut të detit. Ne kemi lënë pusetat gati me gjithë hyrjen dhe bizneset vetëm do bëjnë lidhjen me këto puseta. Gjë që do bëhet brenda këtij sezoni veror dhe nuk do kemi më asnjë derdhje në det dhe asnjë gropë septike në këtë zonë”, u shpreh Kovaçi.

Impianti i trajtimit të ujërave të zeza ne Gjirin e Lalëzit është një investim me vlerë 10 milionë euro, i cili në fazën e parë pritet të mbulojë nevojat e 15 mijë banorëve, për t’u zhvilluar më tej në një fazë tjetër për 20 mijë banorë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.