Komandantët, ministrat dhe shefat e bankave: BE-ja ‘godet’ rrethin më të ngushtë të Putin!

Bashkimi Europian po godet rrethin më të ngushtë të Vladimir Putin në një raund të ri sanksionesh që vijnë 48 orë pasi presidenti rus njohu provincat separatiste të Donbasit, në Ukrainën lindore, si territore të pavarura, duke shkaktuar dënimin ndërkombëtar dhe frikën e pushtimit të afërt.

Lista e objektivave përfshin ministrin rus të mbrojtjes, shefin e shtabit të Putinit, zëdhënësin e ministrisë së jashtme dhe disa komandantë të ushtrisë. Në total do të ndëshkohen 27 persona dhe subjekte të rangut të lartë.

Të gjitha ato do t’i nënshtrohen ngrirjes së aktiveve: bankave me bazë në BE do t’u ndalohet të vënë fonde në dispozicion të tyre, megjithëse kjo do të varet nga shkalla e bashkëpunimit nga subjektet financiare.

Objektivat gjithashtu janë duke u goditur me ndalime udhëtimesh, që do të thotë se atyre u ndalohet hyrja ose kalimi përmes territorit të BE-së.

Lëvizja besohet të jetë një nga reagimet më të forta hakmarrëse që BE ka marrë ndonjëherë kundër Federatës Ruse, një vend që siguron 40% të furnizimeve me gaz të bllokut.

Borrell konfirmoi se vetë Putini është përjashtuar nga paketa. Ai tha gjithashtu se blloku mund të kishte shkuar më tej në përgjigjen e tij, por duheshin bërë kompromise për të arritur unanimitet.

Detajet përfundimtare u zbuluan pasditen e së mërkurës pasi u vendosën prekjet e fundit.

Dënimet do të hyjnë në fuqi sapo të publikohen në gazetën zyrtare të BE-së. Të gjitha shtetet anëtare do t’u kërkohet të respektojnë masat.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.