Komentet e BQE nxisin euron – Niveli më i lartë që prej 2014-ës, do të ndryshojë qëndrimi mbi politikat
Banka Qendrore Europiane bëri të ditur se mund të rishikojë mënyrën e komunikimit në fillim të 2018-ës, duke shtuar pritshmëritë se politikëbërësit po përgatiten për të reduktuar stimujt monetarë.
“Komunikimi në lidhje me qëndrimin mbi politikat monetare si dhe mbi udhëzimin për të ardhmen, mund të rishikohet herët gjatë këtij viti”, shkruhet në dokument. Ky mesazh solli edhe rritjen e euros kundër dollarit.
Sipas procesverbalit të takimit të Dhjetorit, ndërkohë që Eurozonë po regjistron rritjen më të fortë në një dekadë, BQE duhet të ndërrojë gradualisht qëndrim për të shmangur një lëvizje të prerë më vonë.
Sipas analistëve, kjo gjë është pritur prej kohësh, por komentet e institucionit e bënë formale procesin e udhëzimit të daljes nga politikat e pazakonta monetare. Euro fitoi gati 1% kundër dollarit, duke prekur 1.2130, niveli më i lartë që prej 2014-ës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.