Komision disiplinor për përmbaruesit – Do të vihet në lëvizje nga Ministria e Drejtësisë, që do të përgatisë dosjet hetimore
Ministria e Drejtësisë ka urdhëruar ngritjen e një Komisioni Ad Hoc Disiplinor i cili do të hetojë shkeljet e përmbaruesve gjyqësorë privatë dhe do të marrë masat ndaj tyre. Komisioni Disiplinor do të krijohet me ligj për të hetuar, shqyrtuar dhe vendosur mbi të gjitha rastet që lidhen me procedimet disiplinore ndaj përmbaruesve gjyqësorë privatë, pas paraqitjes së raportit të hetimit së bashku me dosjen hetimore përkatëse nga ministri i Drejtësisë.
Në urdhërin e Ministrisë së Drejtësisë që mban datën 22 qershor, bie në sy se do të jetë vetë ajo që do të nis procedimet ndaj përmbaruesve që do të shqyrtohen më pas nga Komisioni Disiplinor, i cili do të përbëhet nga përfaqësues të Dhomës Kombëtare të Përmbaruesve Privatë, Ministria i Drejtësisë dhe nga Shkolla e Magjistraturës.
“Ministri i Drejtësisë, me kërkesë të tij, dhe duke u bazuar në rezultatet e hetimit, ndërmerr nismën e fillimit të procedimit disiplinor, duke ia kaluar raportin e hetimit dhe dosjen hetimore Komisionit Disiplinor, thekson një prej neneve të Urdhërit.
Procedimi disiplinor kundër përmbaruesit gjyqësor privat fillon kur gjatë hetimit që ka zhvilluar Ministria e Drejtësisë konstatohen shkelje të detyrës apo veprime të parregullta gjatë ushtrimit të veprimtarisë së përmbaruesit gjyqësor privat. Procedimi disiplinor kundër përmbaruesit gjyqësor privat vazhdon edhe në rast se pala në proces ekzekutimi tërheq ankimin dhe gjatë verifikimit janë konstatuar shkelje të detyrës apo veprime të parregullta, të kryera gjatë ushtrimit të veprimtarisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.