Kompanitë e lojërave e aplikacioneve fitojnë 22 milionë dollarë në Shqipëri – Vendi i 94-t nga 100 në nivel botëror

Tregu i lojërave online dhe në celular në Shqipëri për vitin 2017 pritet të sjellë 22 milionë dollarë të ardhura për prodhuesit. Të dhënat vijnë nga “newzoo”, një kompani e specializuar për mbledhjen e statistikave të këtij sektori.

Në analizë janë marrë 100 shtete, nga ku Shqipëria renditet në vendin e 94-t për nga të ardhurat e gjeneruara. Në rajon Shqipëria arrin të lërë pas vetëm Maqedoninë në vendin e 97-të, ndërkohë që fitimet e prodhuara në vendet e Ballkanit Perëndimor arrijnë deri në 73 milionë dollarë në rastin e Serbisë.

Megjithatë, këto të ardhura në të shumtën e rasteve janë të pataksueshme, pasi u përkasin kompanive të mëdha të lojërave dhe jo atyre vendase, të cilat janë të pakta në numër. Këto kompani nuk kanë qendra në Shqipëri e as nuk janë të regjistruara, duke e bërë të pamundur kështu vjeljen e tatimeve.

Një shembull i tillë është Netflix, ku përdoruesit paguajnë një abonim mujor për të parë filma. Kjo kompani ofron shërbim edhe për klientët në Shqipëri, por nuk rezulton e regjistruar në QKR.

Aktualisht ka një debat brenda shumë qeverive për gjetjen e mënyrave të taksimit të këtyre lojërave dhe platformave, të cilat së bashku me shitjet dhe blerjet online përbëjnë një pasuri të madhe në lojë.

Mënyrat se si një aplikacion fiton para janë të ndryshme, por kanë të bëjnë kryesisht me blerjet e një aplikacioni, blerje brenda lojës ose me gjenerimin e të ardhurave për shfaqjen e reklamave.

Sipas të dhënave të dy platformave kryesore, iOS dhe Android, rezulton se aplikacionet që kanë patur më shumë fitime në Shqipëri janë:

Por, pavarësisht popullaritetit më të ulët, ka edhe kompani shqiptare që kanë burim të ardhurash botën online. Të tilla aplikacione shqiptare e kompani shqiptare janë me qindra në numër, por taksimi i të ardhurave prej tyre duket shumë i vështirë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.