Kompensim financiar për pasagjerët e 1 dhjetorit 2017 nga Rinasi! Autoriteti i Aviacionit Civil: Për vonesat apo anulimet, plotësoni ankesën
Pasagjerët e fluturimeve ajrore që përballen me vonesa oraresh mund të përfitojnë kompensim nga kompania përkatëse. Autoriteti i Aviacionit Civil, në një komunikim publik, u bën thirrje të gjithë pasagjerëve se për çdo ankesë për vonesa ose anulime fluturimesh nga kompanitë ajrore, të mos hezitojnë por të plotësojnë formularët e ankimimit, dhe t’i dërgojnë te kompanitë përkatëse, për të mbrojtur të drejtat e tyre.
Në këtë kuadër, Autoriteti njofton edhe një rast konkret ku kompania do të kompensojë pasagjerët për vonesën e një fluturimi të datës 1 dhjetor 2017.
“Autoriteti i Aviacionit Civil njofton të gjithë pasagjerët e fluturimit të linjës Tiranë-Verona, nr. fluturimi BV2235 të dt 01 Dhjetor 2017, se formulari i ankimimit për vonesën 10 orë ndaj kompanisë, është pranuar. Pas insistimit nga Autoriteti i Aviacionit Civil, pasagjerët që plotësuan formularin e ankimimit në 01.12.2017, do të kompesohen në vlerë monetare nga kompania për vonesën” njofton AAC, duke u kërkuar pasagjerëve të këtij fluturimi që të kontaktojnë me telefon apo email kompaninë përkatëse.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.