Kompensimet, akordohen fondet që s’shpërndahen kurrë – Zbardhet buxheti afatmesëm 2022-2024 për ATP, 136 milionë dollarë për pronarët

Megjithëse nuk shpërndahen kurrë, Qeveria vit pas viti vë në dispozicion të procesit të kompensimit të pronave dhjetëra milionë dollarë. Siç ndodh në çdo program buxhetor vjetor apo afatmesëm, për periudhën 2022-2024 ka parashikuar rreth 136 milionë dollarë në fondin për kompensimin e pronarëve. Specifikisht, 4,2 miliardë lekë, afërsisht 42 milionë dollarë janë parashikuar të shpërndahen për këtë qëllim në vitin 2022, shifër që parashikohet të rritet në rreth 4.7 miliardë lekë, apo rreth 47 milionë dollarë për secilin nga vitet e mëpasshëm 2023 dhe 2024.

Rreth 50 milionë dollarë miratohen në buxhetin e shtetit vit pas viti, por vetëm një pjesë shumë e vogël e tij lëvrohet. Po t’i referohemi shifrave të vitit 2020, rezulton se Agjencia e Trajtimit të Pronave ka ndaluar thuajse tërësisht dëmshpërblimit financiar të pronarëve, duke I dhënë përparësi vetëm kompensimeve me kërkesë të veçante. Kompensimet me kërkesë të veçante është një skemë përmes së cilës pronarëve u ofrohet mundësia të heqin dorë nga një pjesë e shumës së kompensimit, në këmbim të përfitimit të pjesës së mbetur jashtë radhe. Në raportin e saj të punës për vitin 2020, Agjencia njofton se Kursimi I Buxhetit të Shtetit nga kjo formë kompensimi është 1,252,744,470 lekë, afërsisht 12 milionë dollarë.

Gjatë vitit 2020 Agjencia raporton se u shpërnda një fond për kompensim financiar prej 855 milionë lekësh, apo afërisht 8 milionë dollarësh. Prej saj, 49 milionë lekë, afërisht 500 mijë dollarë, për kompensim financiar, ndërsa pjesa tjetër prej rreth 8 milionë dollarësh ka shkuar për kompensim financiar me kërkesa të veçanta.

Edhe më të ulëta janë shifrat gjatë vitit 2021, kur Gjykata Kushtetuese rrëzoi dy nene të Ligjit për Trajtimin e Pronës.

Është vete ky institucion që raporton për Ministrinë e Drejtësisë se Gjate periudhës Janar – Prill .  ATP duke u bazuar ne ligjin 133/2015 “Per trajtimin e prones dhe perfundimin e procesit te kompensimit te pronave dhe akteve nenligjore”, ka kompensuar vetëm  216 subjekte qe kane përfituar kompensim me raste te veçante. Procesi i ekzekutimeve për vendimeve përfundimtare që kanë njohur të drejtën e kompensimit aktualisht është i bllokuar për shkak se në datën 04.02.2021, Gjykata Kushtetuese mori në shqyrtim kërkesën e Shoqatës “Pronësi me drejtësi”, në lidhje me Kushtetutshmërinë e Ligjit 133/2015, neni 6, pika 1, shkronja “b” dhe neni 7, Pika 2, shkronjat “a” dhe “b” dhe VKM 223/2016, të ndryshuar etj.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.