Kompensimet e pasagjerëve – AAC: Ja kompania më problematike. Këshillat për udhëtarët në prag të festave
E ndërsa festat e fundvitit po afrojnë, e bashkë me ta edhe fluksi i udhëtarëve drejt dhe nga Aeroporti Ndërkombëtar ‘Nënë Tereza’, Aviacioni Civil ka një listë me këshilla për pasagjerët para udhëtimit.
Me qëllim shmangien e problematikave që mund të krijohen, sipas AAC-së, 3-4 orë para nisjes, duhet të kontrollojnë në faqet zyrtare të aeroportit nga nisen ose të kompanive ajrore, pasi mund të ketë vonesa ose anulime për shkak të motit. Kjo vlen kryesisht për ata që udhëtojnë drejt ose nga destinacionet italiane, pasi përbëjnë edhe përqindjen më të lartë të udhëtarëve në Aeroportin e Tiranës.
Ndërkohë, AAC sjell në vëmendje edhe të drejtat e udhëtarëve, ku fton këta të fundit të kontaktojnë institucionin për të gjitha rastet që gjykojnë të padrejta përgjigjet e marra nga kompanitë.
“Në rast të problematikave, si vonesa mbi 3 orë, ose anulim kur ndodhen në aeroport, pasagjerët kanë të drejtë të marrin falas nga kompanitë ajrore ushqim, akomodim në hotel dhe një telefonatë falas.
Gjithashtu, bazuar në rregulloret Europiane të transpozuara edhe në legjislacionin shqiptar, në raste të vonesave ose anulimit të fluturimit për shkaqe që s’lidhen me motin, pasagjerëve ju takon me ligj 250 eu kompensim, nga ana e kompanive ajrore. Mënyra e vetme për të përfituar është duke plotësuar formularin e animimit dhe më pas dërgimi me email te adresat customcare të kompanive ajrore, bashkë me evidencat e biletës.”
Sipas AAC-së, deri më tani numërohen rreth 700 kompensime të aprovuara nga kompanitë ajrore nga rreth 1900 formularë të dorëzuar. ‘Fly Ernest’ vijon të mbetet kompania më problematike sipas Autoritetit, e cila prej disa muajsh ka bllokuar procesin e kompensimit të pasagjerëve.
“AAC në bashkëpunim edhe me Autoritetin e Aviacionit Civil Italian dhe me Komisionin Europian🇪🇺️, është duke punuar për masa shtesë ndaj kësaj kompanie”, deklaron AAC.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.