Kompensimi i dëmeve nga përmbytjet – KESH do të paguaj diferencat e mbetura të kompensimit në Shkodër
Korporata Elektroenergjetike Shqiptare do të paguaj diferencat e palikujduara për familjet dhe subjektet që kanë pësuar dëme si rezultat i përmbytjeve, në qarkun e Shkodrës.
Diferenca e palikujduar nga vlera e kompensimit, një miliard e njëqind e dymbëdhjetë milionë lekë, që do të rezultojë pas rakordimit të shumave të paekzekutuara ndaj familjeve dhe subjekteve, sipas vendimit të Këshillit të Ministrave do të paguhet nga KESH.
Ministria e Punëve të Brendshme duhet që të japë listën e plotë të familjeve dhe subjekteve të cilat përfitojnë kompensim, në të cilën duhet të evidentohen vlerat fillestare, vlerat e shlyera dhe vlerat e mbetura të detyrimit.
Këto të dhëna duhet që të sigurohen brenda një afati 20 ditorë nga hyrja në fuqi e këtij vendimi. KESH, sha-ja. pasi të rakordojë detyrimet e pashlyera, duhet të fillojë menjëherë kryerjen e drejtpërdrejtë të pagesave ndaj subjekteve të përcaktuara në vendim, të cilave nuk u është përmbushur detyrimi i dhënies së kompensimit për dëmet në kulturat bujqësore dhe në biznese.
Kryerja e pagesave do të bëhet drejtpërdrejt nga KESH, sha-ja. nëpërmjet bankave të nivelit të dytë. Procedurat e pagesës përcaktohen me urdhër të ministrit të Energjisë dhe Industrisë.
Ndërkohë që KESH, ngarkohet të informojë, Ministrinë së Financave, Ministrinë e Punëve të Brendshme, Këshillin e Qarkut Shkodër në përfundim të procesit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.