Kompensimi i karburantit për transportin – Vendimi: Aplikimet do pranohen deri në 1 gusht, efekti financiar është 430 milion lekë
Operatorët e transportit kanë afat deri në datën 1 gusht për të aplikuar për përfitimin e rimbursimit të karburantit, pasi në të kundërt nuk do të mund ta përfitojnë vlerën që iu takon. Gjithçka përcaktohet në Vendimin e Këshillit të Ministrave, që përcakton procedurat që duhet të ndiqen nga shoqëritë e transportit për linjat qytetase, rrethqytetase dhe ndërqytetase për marrë kompensimin prej 100 lekë/litër, të parashikuar në Paketën e Rezistencës.
Më konkretisht, kërkesa për të përfituar kompensimin financiar, bëhet nga subjekti çdo muaj pranë administratës tatimore nën juridiksionin e së cilës është regjistruar shoqëria, që është dhe institucioni që do të bëjë verifikimin e dokumentacionit të paraqitur. Ndërkohë që, bashkëngjitur kërkesës nevojitet kopja e licencës, të dhënat identifikuese të subjektit tatimpagues të pajisur me NIUS, si dhe kopje të faturave fizike të furnizimit me karburant për periudhën: mars, prill, maj, të vitit 2021 dhe 2022.
Ato shoqëri, që ushtrojnë edhe aktivitete të tjerë, perveç atyre të transportit, duhet të paraqesin vetëdeklarim të sasisë së karburantit të përdorur për transportin qytetas, rrethqytetas dhe ndërqytetas, si dhe kopje të fletëdaljeve të karburantit gjatë muajve të sipërpërmendur. Me zbardhejn e vendimit të qeverisë nisin edhe afatet për dorëzimin e kërkesave. Ndërkohë që, efekti financiar për zbatimin e kësaj mase është 430 milion lekë dhe do të përballohet nga fondi i kontigjencës për paketën e rezistencës sociale ndaj pasojave të krizës, miratuar për vitin 2022.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.