Kompensimi i pronarëve – ATP publikon regjistrin me 1,462 vendime të vitit 1997
Agjencia e Trajtimit të Pronave ka përfunduar vlerësimin financiar të vendimeve të vitit 1,462 vendimeve të vitit 1997. Për rrjedhoje, të gjithë subjektet, të cilët disponojnë një vendim përfundimtar të vitit 1997, u lind e drejta të aplikojnë për kompensim financiar e fizik pranë kësaj agjencie. Të dhënat mbi këto 1,462 vendime janë vendosur në regjistrin e publikuar në faqen zyrtare të ATP.
Punonjësit e Agjencisë sqaruan për TV Scan se në regjistër gjenden të detajuara gjeneralitetet e subjekteve të shpronësuar, sipërfaqja e njohur për kompensim, vlerësimi financiar përkatës apo mangësitë në dokumentacion dhe problematikat në vlerësim.
Të gjithë subjektet, të cilët evidentojnë mangësi në dokumentacion dhe problematika në vlerësim mund të bëjnë ankesat përkatëse brenda gjashtë muajsh.
Bashkë me vendimet e viteve 1993-1996 arrin në total 17,318 numri i vendimeve të cilëve u është njohur e drejta e kompensimit financiar e fizik.
Kosto shumë e lartë financiare e këtyre vendimeve në pritje të ekzekutimit ka sjellë ndryshime në mënyrën e kompensimit. Nga ky vit, Qeveria ka vënë në zbatim një formulë të re kompensimi për pronarët e ligjshëm, e cila parashikon që kompensimi me para të mos jetë më i lartë se 20% e vlerës së pronës dhe jo më i madh se 10 milionë lekë. Pjesa tjetër e pronës do të kompensohet me tokë bujqësore.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.