Koncesionet mbrohen në Kuvend/Ndryshe nga FMN, Ahmetaj e Gjiknuri: Nuk rrezikojnë financat e vendit

“Rritja e shpejtë e partneriteteve publike-private i ka rritur risqet fiskale, çka kërkon përmirësime të tjera shtesë në kuadrin e investimeve publike”.  Kjo deklaratë e Fondit Monetar Ndërkombëtar e bërë pak ditë më parë, është lexuar ndryshe nga qeveria shqiptare.

Gjatë diskutimit në parim të projektbuxhetit 2019 në seancë plenare, Ministri i Financave dhe Ekonomisë bëri me dije se ekonomia nuk ka asnjë risk nga PPP-të dhe se për këtë është “arbitër” vetë FMN.

Tek partneritetet publike-private u ndal edhe ministri i Infrastrukturës Damian Gjiknuri, sipas të cilit nënshkrimi i këtyre kontratave është një proces i kontrollueshëm që nuk vë në rrezik të ardhmen financiare të vendit.

Ndërsa janë parashikuar një sërë veprash që do të realizohen përmes partneritetit publik-privat, në deklaratën e tij, Fondi Monetar Ndërkombëtar këshillon nxitjen e një procesi me oferta konkurruese duke mos pranuar propozime të pakërkuara. Ndryshime ligjore në këtë pikë janë iniciuar nga Ministria e Financave dhe hyjnë në fuqi më 1 korrik 2019.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.