Koncesioni i portit turistik në Vlorë – Shpallet fituesi me ofertë 22.8 mln euro, Marina duhet të akomodojë jo më pak se 400 anije
Me një ofertë prej 22.8 mln euro bashkimi i përkohshëm i 4 operatorëve është shpallur fitues i koncesionit për ndërtimin e Portit Turistik në Vlorë. Projekti koncesionar është një propozim i pa kërkuar i miratuar nga Ministria e Infrastrukturës dhe Energjisë, ndërkohë që në garë morën pjesë edhe 2 kompani të tjera, që ndonëse paraqitën ofertë më të ulët, u skualifikuan nga gara. Kohëzgjatja e koncesionit është 35 vjet, teksa investimi do të kryhet fillimisht nga kompania dhe pas operimit 35-vjeçar do t’i transferohet shtetit.
Vendndodhja e Portit Turistik “Marina Vlorë” është në qendër të qytetit të Vlorës dhe konkretisht në portin aktual të këtij qyteti, i cili është nën administrimin e Ministrisë se Infrastrukturës dhe Energjisë. Sa i takon kritereve teknike, referuar dokumenteve të tenderit, Marina Vlorë duhet të sigurojë një vend-ankorim të mbrojtur, të sigurt, funksional gjatë gjithë vitit për flotat moderne të jahteve. Gjithashtu, ky port duhet të jetë i aksesueshëm gjatë gjithë stinëve dhe duhet të sigurojë një kanal hyrjeje të sigurt dhe të lundrueshëm përveç basenit të mbrojtur, ndërsa duhet të akomodojë minimalisht 400 anije.
Paralelisht Marina duhet të vendosë në dispozicion dhe të mirëmbajë infrastrukturë akomoduese dhe përpunuese për anijet turistike ekzistuese që operojnë aktualisht në Port, duhet të sigurohet një vend për furnizimin me karburant të mjeteve lundruese, i cili të ketë pajisje ekologjike dhe të sigurt gjatë ofrimit të shërbimit, si dhe duhet të projektohet duke patur parasysh zhvillimin e qëndrueshëm dhe të synojë arritjen e akreditimeve përkatëse të eko-marinës të promovuara nga industria. Ky port do të jetë i pozicionuar 140 km në vijë detare, me Portin e Korfuzit dhe 90 km nga rajoni i Puglias në Itali.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.