Konfirmohet shefja e re e FMN – Bullgarja Georgieva merr postin në një periudhë të vështirë
Ekonomistja bullgare, Kristalina Georgieva, u konfirmua në krye të Fondit Monetar Ndërkombëtar, duke u bërë shefja e parë e huadhënësit botëror që vjen nga një ekonomi në zhvillim. Georgieva, një politikane e qendrës së djathtë që është rritur në Bullgari gjatë Komunizmit, ka qenë shefe ekzekutive e Bankës Botërore dhe zv/Presidente e Komisionit Europian, ku ka luftuar për barazinë gjinore dhe ndryshimin klimatik. Ajo do të përballet me shumë sfida në krye të FMN, përfshirë luftën tregtare mes SHBA dhe Kinës.
Shtetet e Bashkuara, që përfaqësojnë bllokun më të madh votues në bordin e Fondit, janë tërhequr nga paktet shumëpalëshe tregtare. Ndërkohë, rreziqet janë shtuar te ekonomitë në zhvillim, si Argjentina, që mori 57 miliardë dollarë ndihmë vitin e kaluar, që ishte edhe shuma më e madhe për fondin në historik. Georgieva tha se prioriteti i saj do të jetë mbështetja e 189 vendeve anëtare të bankës dhe ulja e rreziqeve. Banka do të ndihmojë të gjithë vendet anëtare, të vogla apo të mëdha, sipas saj.
“E pranoj detyrën time duke qenë në dijeni të sfidave që përballemi. Ekonomia botërore ndodhet në ngadalësim, tensionet tregtare vazhdojnë dhe niveli i borxhit po rritet në shumë vende. Prioriteti im për Fondin është të ndihmojë vendet që të ulin rreziqet e krizave dhe të jenë të gatshme për t’i bërë ballë sfidave, nëse ato ndodhin. Gjithashtu, ne nuk duhet të harrojmë objektivin afat-gjatë, që është fuqizimi i ekonomive dhe përmirësimi i jetëve të njerëzve, nëpërmjet politikave fiskale dhe strukturore,” u shpreh ajo.
Georgieva po zëvendëson Christine Lagarde, që u bë gruaja e parë në krye të Fondit Monetar Ndërkombëtar në vitin 2011. Lagarde drejtoi huadhënësin përmes krizës së borxheve sovrane të Europës, që nisi 1 muaj pasi ajo mori detyrën. Lagarde u largua nga fondi, duke u bërë përsëri gruaja e parë në një tjetër institucion të fuqishëm, që është Banka Qendrore Europiane.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.