“Konfirmon” Banka e Anglisë – Carney thotë se janë shtuar mundësitë e një rritjeje të normës së interesit
Guvernatori i Bankës së Anglisë, Mark Carney, tha se janë shtuar shanset për një rritje të normës së interesit në Mbretërinë e Bashkuara, ndërkohë që banka përpiqet të kontrollojë inflacionin ndërsa procesi i Brexit vazhdon.
Tregjet presin që Banka e Anglisë të rrisë normën bazë me 0.25% në muajin Nëntor. Ndërkohë që Carney nuk konfirmoi kohën se kur do të ndërhyjë, ai sinjalizoi se do të jetë shpejtë.
Banka Qendrore ka paralajmëruar institucionet financiare se përshpejtimi i kreditit konsumator mund të kërcënojë sistemin financiar nëse nuk ndërhyhet.
Ndërkohë që banka të tjera qendrore si Rezerva Federale po kthejnë në normalitet politikat monetare, Banka e Anglisë pritet të rrisë normën bazë të interesit me 25 pikë bazë në 0.5%.
Në mënyrë të ngjashme, Rezerva Federale pritet të rrisë normën e fondeve federale në 1.25-1.5%.
Ndërkohë që guvernatori i Bankës së Anglisë dhe zyrtarë të tjerë në vend kanë shprehur besim se Brexit do të ndodhë në mënyrë të rregullt, ata shtuan së fundmi se do të ketë disa përshtatje.
“Masa e këtyre ndërhyrjeve do të varet nga marrëveshjet përfundimtare mes Britanisë dhe Bashkimit Europian”, tha Mark Carney.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.