‘Konflikt’ edhe për simbolika: Trump nuk pranon të vendosi portretin e Obamës në Shtëpinë e Bardhë
Presidenti Donald Trump po thyen një traditë 40-vjeçare duke mos zbuluar portretin e ish presidentit Barack Obama në Shtëpinë e Bardhë, raportoi të martën NBC News.
Obama gjithashtu nuk do të ishte i interesuar të marrë pjesë në një event të tillë, sipas raportit, i cili citoi njerëzit e njohur me këtë çështje.
Për dekada, presidentët kanë mbajtur ceremoni në Sallën Lindore për të zbuluar portretet e paraardhësit të tyre më të afërt. Obama e bëri këtë për ish-Presidentin Xhorxh W.Bush në vitin 2012, për shembull.
Trump dhe Obama kanë ndoshta marrëdhënien më konfliktuale të çdo presidenti dhe ish-presidenti, në historinë moderne të SHBA. Ditët e fundit, Trump ka bërë pretendime të pabaza se Obama ka kryer një krim të paspecifikuar. Trump kaloi vite duke folur për një teori konspirative raciste në lidhje me vendin e lindjes së Obamës.
Përkundër të kaluarës së tyre të vështirë, Obama i shkruajti Trump një letër inaugurimi dhe e la atë në sirtarin e tavolinës në Zyrën Ovale. Trump në janar 2017 tha se letra ishte “e bukur”.
Por ky armëpushim nuk zgjati shumë, pasi Trump shpesh e fajëson Obamën për çështje të ndryshme me të cilat është përballur si president – përfshirë edhe për çështjet e testimit për COVID-19, që nuk ekzistonte tre vjet më parë.
D.B – SCAN
Burimi: Business Insider
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.