Konflikti për emigrantët në BE – Franca mbështet sanksionet për vendet që refuzojnë azilantët 

Franca mbështet vendosjen e sanksioneve financiare për vendet e Bashkimit Europian që dëbojnë emigrantët me status të vërtetuar si azilantë, sipas presidentit Emmanuel Macron, duke thelluar ndasitë mes vendeve anëtare mbi krizën e emigrantëve.

“Nuk mund të kemi vende që përfitojnë në mënyrë masive nga solidariteti i Bashkimit Europian dhe që ngrenë ashpër zërin për çështjet e lidhura me emigrantët”, tha Macron.

Liderët e BE do të zhvillojnë një takim emergjent në Bruksel për të diskutuar konfliktet mbi emigrimin, me synim që të parapërgatiten për samitin formal të BE në fund të javës së ardhshme.  Macron  i bëri komentet pas takimit të tij të parë me kryeministrin e ri të Spanjës, Pedro Sanchez.

“Ajo që presidenti i Këshillit, Donald Tusk, po propozon, është vendosja e platformave të zbarkimit në vendet tranzite jashtë Bashkimit Europian”, shtoi presidenti Francez.

Të dy liderët ranë dakord se duhet të hapen qendra të reja në Europë për të shqyrtuar aplikimet e azilkërkuesve.   Këto do të vijnë përveç  “platformave të zbarkimit” jashtë BE, ku kërkesa për azil mund të vlerësohet përpara se azilkërkuesit arrijnë në Europë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.