Kongresi i 19-të i Partisë Komuniste – Xi Jinping mbron sistemin socialist, jep premtime për ekonominë
Presidenti kinez, Xi Jinping, hapi kongresin e 19-të të Partisë Komuniste, duke premtuar ndërtimin e një vendi modern socialist, që nuk do të kopjojë sistemet politike të vendeve të tjera dhe do të qëndrojë i hapur me pjesën tjetër të botës.
Presidenti tha se Kina mbështet ekonominë e hapur botërore dhe premtoi se do të zgjerojë liberalizimin e tregut ndaj investitorëve të huaj, pavarësisht përmendjes së përfitimeve nga sistemi socialist.
Në një fjalim 3 orë e gjysmë, Xi Jinping diskutoi progresin e Kinës dhe theksoi perspektivën e vendit në rolin ndërkombëtar për 5 vitet e ardhshme. Me interes për investitorët do të jetë mënyra se si ekonomia e dytë më e madhe në botë do të përparojë pas ndërprerjes së rritjes dyshifrore të 3 dekadave radhazi.
Në fjalimin e tij, Xi Jinping tha se Kina do të vazhdojë me reformat e orientuara nga tregu të tregut të këmbimit si dhe sistemit financiar, duke lënë që tregu të luajë një rol vendimtar në alokimin e burimeve.
“Qeveria do të pastrojë praktikat që pengojnë zhvillimin e një tregu të unifikuar dhe konkurrencën e drejtë, do të mbështesë zhvillimin e firmave private dhe stimulojë gjallërinë e të gjithë subjekteve të tregut“, tha presidenti, ndërsa premtoi edhe hapjen e mëtejshme të sektorit të shërbimeve të kinës ndaj investitorëve të huaj.
Pavarësisht mbështetjes së tij për reformat e tregut dhe firmave private, presidenti bëri gjithashtu thirrje për fuqizimin e firmave shtetërore.
“Qeveria do të promovojë fuqizimin e kapitalit shtetërorë, parandalimin e humbjes së aktiveve shtetërore, thellojë reformat e sipërmarrjeve shtetërore si dhe zhvillimin e një ekonomie me pronësi mikse”, tha ai.
Kongresi që zhvillohet çdo 5 vite, do të mundësojë riorganizimin e lidershipit në Kinë, ku analistët thonë se Xi Jinping do të konsolidojë fuqinë dhe zgjasë mandatin e tij.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.