Kongresi i PPE në Maltë – “Zgjedhje të lira”, Basha takime me udheheqës të partive simotra

Kryetari i Partisë Demokratike, Lulzim Basha, gjatë Kongresit të Partisë Popullore Europiane (PPE) që u mbajt në Maltë, zhvilloi takime me udhëheqës të partive simotra dhe drejtues të institucioneve Europiane.

Në këto takime Basha shpjegoi aksionin opozitar dhe kërkesën ndaj qeverisë në Shqipëri për zgjedhje të lira dhe të ndershme.

Sipas një njoftimi të shpërndarë nga Partia Demokratike, këto dhe çështje të tjera ishin temë diskutimesh mes Bashës dhe Presidentit të PPE, Josef Daul.

Gjatë takimit që pati me ministrin e Jashtëm austriak, Sebastian Kurz, Basha vuri ne dukje rëndësinë themelore që kanë zgjedhjet e lira për të ardhmen europiane të Shqipërisë.

Në vizitën e tij në Maltë, Basha u takua me Komisionerin europian për Sigurinë, Dimitri Avramopulos. Nga ky takim thuhet se Basha mori garancitë për mbështetjen e plotë dhe institucionale nga Komisioneri për Sigurinë, në luftën ndaj krimit në vend.

Kreu i PD-së pati edhe një bashkëbisedimin me Pier-Ferdinando Cazini, kreun e senatit Italian, si dhe senatorin Mario Mauro dhe kryetarin e grupit Forza Italia në Senatin Italian, Paolo Romani.

Kryetari Basha u takua edhe me kryeministrin kroat Andre Plenkovic, me fituesin e zgjedhjeve në Bullgari, Borisov, me Doris Pack, me krerët e partive simotra të Suedisë dhe Sllovenisë, Ministrin federal të Bujqësisë në qeverinë gjermane, Christian Schmidt etj.

PPE është grupimi më i madh politik në Parlamentin Europian dhe aktualisht përfaqësuesit e saj janë në krye të tre institucioneve kryesore të BE, në Parlamentin Europian, Këshillin Europian dhe Komisionin Europian.

Florenc Drizari/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.