Konkurrenca e pandershme, Kërkesa e bashkisë: Kolaudoni taksimetrat, çmime më të ulëta se tavani
Bashkia e Tiranës i kërkon Drejtorisë së Përgjithshme të Metrologjisë nisjen e kolaudimin e taksimetrave të atyre taksive që operojnë në treg me tarifa më të ulëta se tarifat maksimale të shërbimit taksi, poshtë të cilave këto subjekte duhet të operojnë.
Përmes, një shkrese që mban datën 6 dhjetor 2017, drejtori i Përgjithshëm i Punëve Publike, Taulant Tusha ka adresuar këtë kërkesë, duke renditur edhe targat e taksive 4+1, që janë gjetur në shkelje të ligjit e që kanë sjellë konkurrencë të pandershme në treg.
Nga ana tjetër, Tusha i ka kërkuar edhe Ministrisë së Infrastrukturës dhe Energjisë interpretimin e pretendimit të sindikatës së taksive, që kanë denoncuar këtë problem në treg, duke sjellë ulje të fitimit te taksistët e rregullt.
Nga ana tjetër, sindikatat kanë ngritur edhe problemin e operimit të taksive në mënyrë informale. Sipas drejtuesve të sindikatës, taksitë e palicencuara kanë shkatërruar tregun, u shmangen taksave, si dhe janë kthyer në burim konfliktesh dhe aksidentesh.
Më herët taksistët paralajmëruan edhe protesta për këtë problem, por ajo nuk u lejua nga Policia e Shtetit, çka sipas sindikatës ishte një shkelje flagrante e demokracisë dhe të drejtës për të protestuar.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.