Konkurrenca, hetim tregut të hotelerisë – Pas rritjes se jashtëzakonshme të çmimeve për finalen e Ligës së Konferencës!
Prej disa ditësh çmimet e dhomave të hoteleve në Tiranë kanë regjistruar çmime jashtëzakonisht të larta për datën 25 maj kur në kryeqytet do të luhet finalja e Ligës së Konferencës në futboll ndërmjet Romës dhe Fejënordit.
Autoriteti i Konkurrencës, nga monitorimi i platformave online që ofrojnë rezervime ambientesh fjetje si dhe nga monitorime në terren identifikoi çmime tepër të larta për datat 23-25 maj 2022, krahasuar me periudha të tjera të vitit.
Autoriteti i Konkurrencës iu kërkon ndërmarrjeve që ofrojnë shërbimin e fjetjes në hotele dhe akomodime të ngjashme në qytetin e Tiranës të ofrojnë shërbime me çmime të arsyeshme, të orientuara drejt kostos, si dhe të mos anulojnë rezervimet e hershme me qëllim rishitjen në minutën e fundit me çmime disa herë më të larta.
Autoriteti i Konkurrencës iu bën me dije ndërmarrjeve që ofrojnë shërbimin e fjetjes në hotele dhe akomodime të ngjashme në qytetin e Tiranës që, nëse në përfundim të hetimit rezulton se rritja në mënyrë të menjëhershme dhe të pajustifikuar e çmimit të shërbimit të fjetjes në hotele dhe akomodime të ngjashme do të ndëshkohen me gjoba deri ne 10% të xhiros së vitit financiar paraardhës.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.