Konkursi për 24 drejtorët e Burgjeve dhe drejtorin e Policisë së Burgjeve – Kriteret dhe afatet e aplikimit

Pas shpalljes së konkursit për pozicionet drejtuese të sistemit të burgjeve, Ministria e Drejtësisë ka bërë të ditur edhe afatet dhe kriteret e aplikimit për të interesuarit.

Deri më datë 12 Nëntor, individët që përmbushin kriteret duhet të dorëzojnë dokumentacionin e kërkuar pranë këtij institucioni, ose përmes adresës elektronike [email protected] .

Për Drejtorët e 24 Intitucioneve të Ekzekutimit të Vendimeve Penale kriteret janë si më poshtë:

• është shtetas shqiptar;
• ka zotësi të plotë për të vepruar
• nuk është dënuar penalisht me vendim gjykate të formës së prerë
• ka mbaruar arsimin e lartë
• është në gjendje të mirë shëndetësore dhe i aftë fizikisht, për të kryer detyrën;
• të mos ketë konflikt interesi

Dokumentacioni që kërkohet nga kandidatët që kalojnë fazën e kualifikimit janë:

• Jetëshkrimi i plotësuar në përputhje me formatin e përcaktuar
• Fotokopje e diplomës së arsimit të lartë dhe listës së notave;
• Fotokopje e letërnjoftimit ose e pasaportës;
• Formularin e vetëdeklarimit për garantimin e integritetit të personave që ushtrojnë funksione publike

Ndërkohë, i lirë është edhe pozicioni i Drejtorit të Policisë së Burgjeve, për të cilin ka vetëm një kriter shtesë nga sa më sipër, i cili është të ketë shërbyer në Policinë e Burgjeve ose në Policinë e Shtetit për një periudhë, të paktën, 10-vjeçare, ku në 3 nga këto vite të ketë mbajtur gradë të rolit të lartë.

Konkursi për vendet drejtuese në Burgje u shpall i hapur ditën e shtunë, pasi Ministrja Etilda Gjonaj shkarkoi nga detyra drejtorët e burgjeve Lezhë, Lushnje dhe Rrogozhinë. Sipas saj, ishin evidentuar mbi 150 raste të lejimit të futjes së sendeve të ndaluara në ambientet e burgjeve, ndërsa në 6 raste ishte lejuar dhe futja e lëndëve narkotike.

Deri në zgjedhjen e drejtuesve të rinj të dalë nga konkurrimi, komandimin në krye të këtyre burgjeve do të bëhet nga punonjësit me përvojë shumë të gjatë brenda sistemit.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.