Konsumi i birrës e karburanteve “thyen” rekord 8-mujori/ U importuan sasitë më të mëdha në 5 vite
Administrata doganore ka mbledhur afro 9.6 miliardë leke taksa që aplikohen mbi mallrat e konsumit, më shumë se planifikimi, përgjatë 8 mujorit të parë të vitit. Ndër 4 grupet kryesore të mallrave të akcizës, vihet re një rritje e konsiderueshme e importeve dhe rrjedhimisht konsumit krahasuar me 2020-n por jo vetëm.
Sipas të dhënave zyrtare nga Doganat, sasia e importuar e birrës ka arritur në nivelin rekord të 5 viteve të fundit, duke u regjistruar në 33 milionë litra gjatë periudhës Jana-Grusht 2021, me një rritje të konsiderueshme nga viti në vit, me prej 4.5 milionë litrash nga 2020-ta, ku u përjetua edhe kulmi i pandemisë COVID-19 që u pasua më kufizime të shumta të bareve, restoranteve, clubeve dhe jetës ekonomike në tërësi. Duket se qytetarët e kanë shfrytëzuar reduktimin e masave përgjatë kësaj periudhe dhe sezoni veror po ashtu ka dhënë ndikim të lartë në këtë pikë.
Ndërkohë në krahasim me vjet, rritje të konsiderueshëm ka pasur edhe import i karburanteve, i regjistruar në rreth 409 mijë ton, shifër kjo sërish rekord në 5 vitet e fundit. Po ashtu, është importuar më shumë kafe në 8 mujor, krahasuar me 2020-ën, në nivelin e 5746 ton, si dhe më shumë cigare, ku gjatë kësaj periudhe ka hyrë në vendin tonë një sasi prej 1891 ton.
Karburantet dhe cigaret mbajnë edhe vendet e para në renditjen e të ardhurave të doganave sipas mallrave kryesore. Karburantet përbëjnë 24.3% të të ardhurave, me vlerë prej 30 miliardë lekësh, ndjekur nga cigaret me 103.3 për qind dhe të ardhura në 15.8 miliardë lekë për Janar-Gusht 2021.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.