Konsumi i energjisë në Gjermani / Vendi rrit projeksionet deri në vitin 2030 me të paktën 9%
Gjermania ka rritur projeksionet për konsumin e energjisë deri në vitin 2030, me të paktën 9.3%, për shkak të prezantimit të makinave elektrike, objektivave të klimës dhe zëvendësimin e naftës, apo gazit, si karburant. Ministri i ekonomisë, Peter Altmaier, tha se kërkesa për energji elektrike do të jetë mes 645 dhe 665 miliardë kilowatt orë në 2030, nga 590 miliardë kilowatt orë që parashikohej në vitin 2020.
Altmaier tha se konsumi më i lartë do të vijë si pasojë e përshtatjes më të shpejtë të makinave elektrike, me 14 milionë automjete që priten në rrugë deri në fund të dekadës, nga projeksionet e mëparshme për 10 milionë. Përveç makinave, kërkesa për energji do të vijë edhe nga ngrohja e shtëpive. Kompanitë e shërbimeve utilitare kanë kërkuar për objektiva realistë që të bazojnë planifikimet e tyre, duke argumentuar se projeksionet e mëparshme kanë qenë shumë të ulëta. Shoqata gjermane për Industrinë e Energjisë (BDEW) e vlerëson konsumin në 700 miliardë kilowatt orë në vitin 2030. Altmaioer rriti gjithashtu projeksionet për prodhimin e hidrogjenit në Gjermani për vitin 2030, në 19 miliardë kilovat orë, nga 14 miliardë që ishte projeksioni mëparshëm.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.