Kontrata dhe matësi i ujit – Vendimi i qeverisë: Falas për familjet në nevojë, ja kategoritë

Qeveria do të subvencionojë tarifën e lidhjes së kontratës dhe të vendosjes së matësve të ujit për kategoritë në nevojë.

Gjithçka parashikohet në një vendim qeverie, miratuar në datën 12 janar, i cili vjen vetëm 2 javë para nisjes së zbatimit të reformës në sektorin e ujit të pijshëm.

Referuar vendimit, janë disa kategori që do të përfitojnë pa pagesë këto shërbime, ndërsa shpenzimet do të përballohen nga buxheti i Ministrisë së Infrastrukturës dhe Energjisë.

Më konkretisht, lidhja e kontratës dhe matësi falas do të përfitohet nga familjet të cilat trajtohen me ndihmë ekonomike dhe familjet që kanë në përbërje anëtarë që përfitojnë pagesë të aftësisë së kufizuar dhe që nuk kanë anëtarë të familjes të punësuar ose të vetëpunësuar.

Një tjetër kategori që përfiton nga ky vendim janë edhe ato familje, që kanë në përbërje anëtarë që përfitojnë pension invaliditeti shtetëror dhe pension invaliditeti të plotë në fshat.

Kategoria e katërt që përfiton këtë shërbim pa pagesë janë edhe kryefamiljarët që përfitojnë pension pleqërie shtetëror ose që përfitojnë pension pleqërie fshati, por që janë me banim në qytet.

Të gjitha këto kategori do të duhet të deklarojnë pranë ujësjellës-kanalizime faktin se nuk disponojnë një kontratë të lidhur apo nuk janë të pajisur me ujëmatës, duke kërkuar pajisjen me to.

Vendimi i qeverisë i shtrin efektet prej datës 1 janar 2018.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.