Kontratat 1 euro, gjoba për qiramarrësit kur nuk realizojnë investime apo hapin vende pune
Pas rikthimit të praktikës së kontratave me tarifë 1 euro, qeveria ka shtrënguar masat për të garantuar zbatimin e detyrimeve nga ana e sipërmarrësve privatë. Me një vendim të Këshillit të Ministrave, tashmë do të vendosen sanksione financiare, kur qiramarrësi nuk realizon kushtet e kontratës së rënë dakord.
Për çdo vend pune të pahapur, subjekti privat do të penalizohet me një gjobë prej 50 mijë lekësh. Pra nëse një subjekt shprehej në kontratë se do të krijonte 100 vende pune, por ka hapur vetëm 60 vende, për 40 vendet e mbetura ai do të gjobitet me një vlerë totale prej 2 milionë lekësh.
Sanksione do të vendosen edhe në rastin e mosrealizimit të vlerës së investimit të parashikuar në kontratë. Qiramarrësi do të ndëshkohet në këtë rast me një gjobë të barabartë me 10% të vlerës së investimit të parealizuar. Kështu, nëse kontrata përcaktonte një investim prej 1 milion eurosh, por është realizuar vetëm 800 mijë euro, subjekti do t’i paguajë shtetit 20 mijë euro.
Por edhe me pagesën e kësaj gjobe, subjekti nuk lehtësohet nga mosrealizimi i investimit. Investimi ka një afat 6-mujor për t’u realizuar, në të kundërt shteti ka të drejtën të zgjidhë menjëherë kontratën mes palëve.
Në fund të vitit 2017, qeveria miratoi katër kontrata me tarifë një euro, duke i dhënë në shfrytëzim sipërmarrësve privatë godina apo tokë shtetërore. Një prej këtyre kontratave, për ndërtimin e një fabrike të prodhimit të paneleve MDE në Fier, premton të investojë 15 milionë euro dhe të krijojë 300 vende të reja pune në Fier dhe Divjakë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.