Kontroll në njësitë tregtare, Peleshi: Analiza rastësore për produktet e qumështit
Ministria e Bujqësisë të nisë një aksion kontrolli në të gjitha marketet dhe supermarketet me fokus tek produktet e qumështit dhe nënproduktet e tij, për të vënë përpara përgjegjësisë të gjithë abuzuesit që përdorin vajin e palmës.
Ministri Niko Peleshi zhvilloi një takim me përfaqësuesit e kësaj industrie, ku dhe siguroi konsumatorët se sa i përket çështjes së shumë diskutuar të qumështit me aflatoksinë, produktet shqiptare janë në përputhje me standardet e kërkuara të sigurisë ushqimore.
“Kemi disa javë që kemi paralajmëruar shtimin e kontrolleve, rritjen e vigjilencës ndaj këtyre lloj prodhimeve. Besoj që nga analizat, apo nga aksioni që fillon nga sot, në supermarket nuk do të gjejmë guximtarë të operatorëve të vegjël, e theksoj, që do të mund të nxjerrin në raftet e supermarketeve apo marketeve tona, produkte dhe nënprodukte qumështi me përmbajtje të vajit të palmës që është i palejuar. Prodhimi shqiptar është shumë delikat, por unë dua t’i garantoj të gjithë prodhuesit dhe gjithë konsumatorët shqiptarë qe ne jemi shumë shpejt në standardin e sigurisë ushqimore që përkthehet me këto fjalë: Një produkt shqiptar qumësht, nënprodukte qumështi dhe ushqime të tjera, të cilat tregtohen në subjekte të licencuara markete dhe supermarkete, janë ushqime të sigurta dhe të kontrolluara me një protokoll kontrolli të vazhdueshëm nga AKU- ja”.
Aksionit të paralajmëruar para 3 muajve për përforcimin e masave dhe kontrolleve të vazhdueshme në nënsektorin e qumështit, i ka paraprirë një fazë vetëkontrolli, nga e cila u mbyllën 11 subjekte.
“Unë jam i kënaqur me shifrat që kam marrë nga AKU –ja lidhur me këto dy – tre muaj vetëkontrolli. Ka qenë një reagim i mirë, pothuajse 50 % nga 320 subjekte janë përgjigjur duke bërë vëtekontrollin, duke plotësuar pyetësorët në mënyrë shumë të detajuar. Janë bërë 106 kontrolle, janë mbyllur 11 subjekte, por ndërkohë pjesa më e madhe e tyre, rreth 85% e subjekteve, kanë dalë nga kontrolli konform standardeve tona dhe kjo ka ardhur falë investimeve dhe rritjes së standardit që ka bërë sektori në përgjigje të sensibilizimit të filluar që para tre muajve. Aktualisht me iniciativën e tyre 19 punishte janë vetëmbyllur dhe po i nënshtrohen rikostruksionit.”
Ministria e Bujqësisë ka nisur disa aksione paralelisht, si ai në sektorin e qumështit, mishit, etj, për të rritur standardet e sigurisë ushqimore në vend.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.