Kontrollet anti-informalitet – Tatimet, në një javë “në sitë” mbi 2500 biznese

Numri i bizneseve të cilat tashmë kanë kaluar në “sitën” e tatimorëve arrin në 2582 vetëm në një javë. Sipas të dhënave nga Ministria e Financave, referuar kontrolleve tatimore rezulton se gjatë kësaj periudhë janë kryer 36 vizita fiskale, 662 verifikime në vend dhe 1883 kontrolle nga zyra.

Ndërkohë që nga shërbimi i tatimpaguesve numri i njoftimeve të përgatitura për bizneset me qëllim parandalimin e mashtrimit dhe nxitjen e korrektimit vullnetar janë 16, tatimpagues të njoftuar me email janë 3976, vizita këshilluese të përfunduara janë bërë në 8494 biznese, ndërsa 14 234 tatimpagues janë asistuar ballë për ballë.

Administrata Tatimore tashmë është e pranishme në territor për të garantuar zbatueshmërinë e ligjit dhe bashkëpunuar me tatimpaguesit dhe qytetarët në “betejën” kundër evazionit dhe informalitetit.

Administrata Tatimore që në fillim të këtij muaji u ka bërë thirrje subjekteve të paregjistruar që të mos ushtrojnë aktivitet pa dokumentacionin përkatës, ndërkohë që ka theksuar se është e vendosur të zbatojë ligjin, me tolerancë zero për të gjithë ata tatimpagues të cilët rezultojnë jo formalë. E njëjta gjë vlen edhe për çdo subjekt tregtar që kryen evazion fiskal.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.