Kontrolli i bankave britanike – BOE: Asnjë bankë nuk duhet të rrisë kapital, të mbrojtura nga Brexit

Bankat në Britani mund të përballojnë një skenar negativ të Brexit, pa patur nevojën e shpëtimit nga taksapaguesit apo ndikim në huadhënie, sipas kontrollit vjetor të Bankës së Anglisë.  Për të parën herë që kur nisi të testojë bankat, asnjë prej huadhënësve kryesorë të vendit nuk duhet të shtojë kapital, deklaron Banka Qendrore. Barclays nuk arriti pikën referencë për raportin e kapitalit bazë kundër aktiveve të ponderuara me risk (CET1)  dhe mbi levën financiare,  të matur nga raporti i kapitalit bazë ndaj totalit të aktiveve.

Megjithatë, nuk iu kërkua të rrisë kapitalin falë hapave të ndërmarrë që prej Dhjetorit, përfshirë  emetimin e 2.5 miliardë paund letra me vlerë të konvertueshme në aksione (CoCo bonds) si  dhe shitjen e njësisë në Afrikën e Jugut.  Edhe Royal Bank of Scotland nuk e arriti minimumin për kapitalin rregullator, por nuk kishte nevojë për rritje të kapitalit.

“Banka e Anglisë gjykon se sistemi bankar mund të vazhdojë të mbështesë ekonominë reale,  edhe nëse ndodh një skenar negativ i Brexit”, tha guvernatori Mark Carney.  HSBC, Lloyds, Santander UK, Standard Chartered dhe Nationwide Building Society, e kaluan me sukses provën e rezistencës.

Ekonomia e Britanisë ka humbur vrull këtë vit, ndërkohë që inflacioni i lartë ka ulur të ardhurat në dispozicion të ekonomive familjare, gjë që solli uljen e projeksioneve për rritjen nga Qeveria. Britania del në Mars të 2019-ës dhe politikëbërësit e Bankës së Anglisë kanë thënë se duhet arritur një marrëveshje tranzitore,  gjë që do të ulë rreziqet ndaj stabilitetit financiar.  Megjithatë, edhe nëse Britania del pa asnjë marrëveshje nga BE, Banka Qendrore tregoi në testin se huadhënësit janë mjaftueshëm të fortë për ta përballuar.

Edhe pse kontrolli nuk futi në analizë goditjet ekonomike të lidhura drejtpërdrejt me daljen, bankat u testuan në rast të rënies së prodhimit të Britanisë me 4.7%, rënies së paundit me 27% kundër dollarit, zhvlerësimit të çmimeve të shtëpisë me 30% si dhe kostove ligjore prej 40 miliardë paund.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.