Korea e Jugut nuk do nxitojë me vaksinën. Do mbikëqyrë rezultatet në vende të tjera, përpara se të nisë vaksinimin
Korea e Jugut deklaroi këtë Javë se ka nënshkruar marrëveshje për të ofruar vaksina të koronavirusit për 44 milionë njerëz vitin e ardhshëm, por nuk do të nxitojë në injeksionet për të vëzhguar për më gjatë efektet anësore. Kjo qasje e kujdesshme vjen ndërkohë që vendi po lufton me rritjen e rasteve dhe mbi-ngarkesën tek sistemi shëndetësor. Vende të tjera po japin miratime emergjente për vaksinën, në përpjekje për të parandaluar transmetimin. Britania nisi vaksinimin në masë sot dhe Shtetet e Bashkuara me Indinë po shqyrtojnë vaksinat.
Qeveria e Koresë së Jugut ka blerë 60 milionë doza nga AstraZeneca, Pfizer dhe Moderna, si dhe 4 milionë nga Johnson & Johnson, për të mbuluar 34 milionë njerëz. Doza shtesë për 10 milionë njerëz do të blihen nëpërmjet projektit COVAX të OBSH. Pavarësisht rritjes së rasteve, Ministri i Shëndetësisë, Park Neung-hoo, tha se suksesi i mëparshëm i qeverisë për të frenuar rastet, nënkupton se nuk ka nevojë për nxitim në vaksinim. Dërgesat e vaksinës do të nisin jo më vonë se muaji Mars, por autoritetet do të mbikëqyrin se si vaksina funksionon në vende të tjera për disa muaj. Vaksinimi në masë në Korenë e Jugut, pritet të ndodhë në gjysmën e dytë të vitit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.