Koreja e Veriut optimiste në takimin e papritur të Trump-Kim – Një shans për të nxitur bisedimet bërthamore
Udhëheqësi i Koresë së Veriut Kim Jong Un dhe Presidenti i SHBA Donald Trump ranë dakord në takimin e tyre të dielën për të shtyrë përpara dialogun për të avancuar në procesin e denuklearizimit të gadishullit Korean, bëri me dije të hënën media e Koresë së Veriut. Trump u bë presidenti i parë i SHBA-së që viziton Korenë e Veriut të dielën, kur ai u takua me Kim në Zonën e Demilitarizuar (DMZ) midis dy Koreve duke rënë dakord për rifillimin e bisedimeve bërthamore.
“Udhëheqësit kryesorë të të dy vendeve ranë dakord të vazhdojnë të jenë në kontakt të ngushtë edhe në të ardhmen, dhe të rifillojnë dhe të shtyjnë përpara dialogët produktiv për të bërë një hap para në denuklearizimin e gadishullit Korean dhe në marrëdhëniet dypalëshe”, tha agjencia e lajmeve KCNA . Sekretari i Shtetit i SH.BA-së Mike Pompeo u tha gazetarëve pak përpara largimit nga Koreja e Jugut se një raund i ri bisedimesh do të ndodhte “diku në korrik” dhe negociatorët e veriut do të ishin diplomatë të ministrisë së jashtme.
Në një foto të lëshuar nga KCNA të hënën, Ministri i Jashtëm i Koresë së Veriut Ri Yong Ho dhe Pompeo tregohen të ulur pranë Kim dhe Trump përkatësisht në Freedom House, ndërtesa në të cilën dy liderët realizuan bisedimet e tyre kokë më kokë. Kim tha se ishte marrëdhënia e mirë personale që kishte me Trump që bëri të mundur një takim kaq dramatik të njoftuar veç një ditë përpara, dhe se marrëdhënia me Trump do të vazhdonte të prodhonte rezultate të mira, sipas KCNA.
Burimi: Reuters
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.