Koronavirus ”infekton” edhe linjat ajrore/ Parashikohet një humbje prej 87 miliardë dollarësh
Coronavirus mund t’iu kushtojë industrisë së linjave ajrore 113 miliardë dollarë këtë vit, duke katërfishuar pothuajse vlerësimet e mëparshme, nga Shoqata Ndërkombëtare e Transportit Ajror (IATA), të cilat parashikoheshin të arrinin shifrën e 29.3 miliardë dollarë. Vlerësimi i mëparshëm, lëshuar nga IATA në 20 shkurt 2020, u bazua në një skenar ku ndikimi i koronavirusit “do të kufizohej kryesisht në tregjet e lidhura me Kinën”. Por me virusin tani në 80 vende të botës, ndikimi i tij tashmë po ndjehet kudo. Në një analizë të tjetër, të publikuar më 5 Mars 2020, IATA tha se tani ekzistojnë dy skenarë të mundshëm.
Skenari 1: Përhapja e kufizuar
Në skenarin më të mirë, bazuar në tregjet me 100 ose më shumë raste të konfirmuara të koronavirusit, IATA vlerëson se humbja e të ardhurave në të gjithë botën do të arrinte shifrën e 63 miliardë dollarëve. Shumica e kësaj humbje do të ishte në Kinë, ku parashikohej të arrinte shifrën e 22 miliardë dollarëve, duke prekur kështu dhe tregjet Aziatike.
Në raport, IATA parashikon se do të ketë një rënie me 24 përqind të numrave të pasagjerëve, për shkak të prekjes masive që ka pësuar Italia. Kjo rënie do të pasohet nga Kina me (23 përqind), Irani (16 përqind), Koreja e Jugut (14 përqind), Japonia (12 përqind), Singapori (10 përqind), Franca (10 përqind) dhe Gjermania (10 perqind).m Duke përjashtuar Kinën, Japoninë, Singaporin dhe Korenë e Jugut, Azia do të përjetonte një rënie prej 11 përqind të numrit të pasagjerëve.
Ndërsa në Europë, duke përjashtuar Italinë, Francën dhe Gjermaninë, parashikohet një rënie prej 7 përqind.
Skenari 2: Përhapje e gjerë
Skenari i dytë bazohet në tregje që kanë 10 ose më shumë raste të konfirmuara të koronavirusit. Në këtë rast, IATA vlerëson se humbjet e të ardhurave në të gjithë botën për industrinë ajrore mund të jenë deri në 113 miliardë këtë vit. Duke folur financiarisht, kjo “do të ishte në një shkallë të barabartë me atë që industria përjetoi në Krizën Globale Financiare,” sipas IATA.
Humbjet më të rënda do të ndiheshin në Australi, Kinë, Japoni, Malajzi, Singapor, Korenë e Jugut, Tajlandë dhe Vietnam, të cilat së bashku mund të përballen me humbje deri në 49,7 miliadë dollarë, përmes një rënie me 23 përqind të numrave të pasagjerëve. Austria, Franca, Italia, Gjermania, Hollanda, Norvegjia, Spanja, Zvicra, Suedia dhe Mbretëria e Bashkuar do të jenë vendet të cilat parashikohen të dëmtohen më pak, ndërsa për Kanadanë dhe Shtetet e Bashkuara të Amerikës, në raport shkruhet se do të përjetojnë një rënie me 10 përqind të numrit të udhëtarëve.
“Kthesa e ngjarjeve si rezultat i COVID-19 është pothuajse pa precedentë. Në pak më shumë se dy muaj, perspektivat e industrisë në pjesën më të madhe të botës kanë marrë një kthesë dramatike për keq. Eshtë ende e paqartë se si do të vijojë ecuria e përhapjes së virusit, por nëse shohim ndikimin që përmbajnë disa tregje dhe një humbje të ardhurash prej 63 miliardë dollarësh, apo një ndikim më të gjerë që çon në një humbje prej 113 miliardë dollarësh të të ardhurave, kjo është një krizë. Shumë linja ajrore po zvogëlojnë kapacitetin dhe po marrin masa emergjente për të ulur kostot. Qeveritë duhet të marrin parasysh faktin se linjat ajrore janë duke bërë çmos për të përballuar këtë ngjarje, ndërsa kryejnë detyrën thelbësore për të lidhur ekonomitë e botës. Nisur nga kjo, kërkojmë që të merret në konsideratë lehtësimi i taksave apo tarifave. Në këtë gjendje të jashtëzakonshme është nevoja thelbësore për masa stimuluese nga qeveria” – ka theksuar ndër të tjera, Drejtori i Përgjithshëm i IATA, Alexandre de Juniac.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.