Koronavirus/ Mbretëria e Bashkuar, gati me planin e ri të “shpëtimit” nga bllokimi

Mbretëria e Bashkuar ka ecur përpara me programin e saj të vaksinimit të shpejtë. Kryeministri Boris Johnson pritet të paraqesë planin e tij për ta kthyer Anglinë në normalitet. Këtë të hënë, kryeministri britanik pritet “të përcaktojë një udhërrëfyes për të nxjerrë vendin nga karantina me kujdes”, sipas deklaratës së tij për media.

Johnson pritet të konfirmojë rihapjen e të gjitha shkollave angleze në 8 Mars, një nga hapat e parë të mëdhenj për ta kthyer vendin në normalitet. Britania është një nga vendet më të goditura globalisht nga pandemia COVID-19, me më shumë se 120.000 vdekje nga virusi. Nga ana tjetër,  ishte gjithashtu kombi i parë që filloi një fushatë vaksinimi masiv.

Udhërrëfyesi do të zbatohet vetëm për Anglinë, me rregullat e bllokimit në Skoci, Uells dhe Irlandën e Veriut të mbikëqyrur nga administratat e transferuara në secilin vend. Suksesi i përhapjes së vaksinës së COVID, do të thotë që më shumë se 17 milionë njerëz deri tani kanë marrë të paktën dozën e parë të vaksinës – një e treta e popullsisë së rritur në Mbretërinë e Bashkuar.

Burimi origjinal: Deutsche Welle

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.