Koronavirusi i ri, “mposht” SARS! Numri i të vdekurve kalon atë të epidemisë së vitit 2003
Numri i vdekjeve në të gjithë botën nga koronavirusi i ri ka arritur në 811 duke kaluar vdekjet e shkaktuara nga SARS.
Autoritetet e shëndetit në provincën Hubei raportuan 81 persona të vdekur gjatë ditës së fundit, duke e çuar totalin në Kinë në 803.
Numri total në të gjithë botën qëndron në 811, përfshirë një vdekje në Filipine dhe një në Hong Kong. Virusi SARS në vitin 2003 vrau 774 persona dhe infektoi 8,100 në të gjithë botën, sipas të dhënave të Organizatës Botërore të Shëndetësisë.
Hubei, province kineze ku nisi përhapja e virusit, mban numrin më të madh të vdekjeve dhe rasteve të të infektuarve në të gjithë botën.
Komisioni i Shëndetit në Hubei raportoi 2,147 raste të reja në ditën e kaluar, duke e çuar totalin në provincë në 27,100.
Virusi i ri, i raportuar për herë të parë tek Organizata Botërore e Shëndetësisë në fund të muajit Dhjetor, mendohet se është shfaqur në një treg ushqimor në Vuhan, që është qendra e Hubeit. Që prej atëherë, ka infektuar mbi 35,000 persona në të gjithë botën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.