Koronavirusi, infermierja tregon shenjat e maskës dhe apelon: “Qendroni në shtëpi, mos na e çoni dëm mundin tonë”

“Jam një infermiere dhe në këto momente gjendem duke u përballur me këtë emergjencë sanitare”. Nis kështu rrëfimi i Alessia Bonarit, një infermiere e re e spitalit të Grosseto-s në Itali, në një postim në Instagram, ku bën një apel për të respektuar masat e vendosura nga qeveria për frenimin e përhapjes së koronavirusit.

‘Jam e lodhur fizikisht sepse pajisjet e mbrojtjes të vrasin, këmisha të bën të djersisësh dhe kur e vesh nuk mund të shkoj më në banjo apo për të pirë për 6 orë” tregon Alessia. Por fotoja që e shoqëron postimin e saj vlen më shumë se 1 mijë fjalë: Shihet një vajzë e re me këmishë dhe me fytyrën me shenja lodhje dhe nxirje përreth syve, të shkaktuara nga maska që duhet ta mbrojë atë ndërsa punon me të sëmurët.

“Ajo që i kërkoj të gjithë atyre që po lexojnë këtë postim është që të mos na e zhbëni sforcimin që po bëjmë, të jeni altruistë, të qendroni në shtëpi e kështu mbroni ata që janë më të brishtë. Ne të rinjtë nuk jemi imunë ndaj koronavirusit. Edhe ne mund të sëmuremi dhe më keq akoma, mund të sëmurim të tjerë” vijon ajo.

Alessia Bonari është diplomuar për infermiere në 2018 dhe prej më pak se një viti punon në spitalin e Grossetos. Tani gjendet në vijën e parë kundër virusit që po terrorizon botën dhe që po tenton të gjunjëzojë Italinë.

“Kam frikë dhe unë, por jo aq sa të shkoj të bëj bëj blerje” shkruan ajo duke nënkuptuar mbase atë që ndodhi në marketet italiane. “Kam frikë të shkoj në punë. Ka frikë edhe sepse maska mund të mos më jetë përshtatur mirë më fytyrën dhe mund të kem prekur aksidentalisht me doreza të pista ose ndoshta lentet nuk mund mbulojnë të gjithë pjesën e syve dhe diçka mund të ketë kaluar” vijon ajo.

Mendimi shkon për kolegët që punojnë me të dhe për të sëmurët që tentojnë të shpëtojnë. “Jam e lodhur psikologjikisht dhe si unë edhe të gjithë kolegët e mi që prej javësh gjenden në të njëjtat kushte, por kjo nuk do na ndalojë që të bëjmë detyrën tonë siç kemi bërë gjithnjë. Do të vazhdoj të kuroj dhe të kujdesem për pacientët e mi sepse jam krenare dhe e dashuruar me punën time” shkruan

Në Grosetto pacienti i parë pozitiv me koronavirus është regjistruar me 4 mars. Prej një jave, mjekë dhe infermierë po punojnë në një situatë që çdo ditë bëhet me dramatike. “Nuk mund t’ia lejoj vetes luksin të kthehem në shtëpinë time në karantinë. Duhet të shkoj në punë dhe të bëj pjesën time. Ju bëni tuajën. Jua kërkoj me përgjerim…” shkruhet në postimin që ëhstë bërë viral në median italiane.

Burimi: La Repubblica/Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.