Koronavirusi në Itali-Të dhënat e detajuara të asaj që po ndodh. Harta e të prekurve dhe masat shtrënguese të qeverisë

Dy muaj pas rastit të pare të regjistruar në Wuhan, koronavirusi shpërthen edhe në Itali. Ka arritur në 76 numri i të prekurve, rezidentë në Lombardi, Veneto dhe Piemonte. 54 persona janë në Lombardi, 17 janë rastet e konfirmuara në Veneto, 1 në Piemonte, 2 në Emilia dhe 2 në Lacio.

Veriu i Italisë është në alarm.

Viktima e parë italiane është Adriani Trevisan, 78 vjeçar, ish sipërmarrës në sektorin e ndërtimit. Viktima e dytë është Giovanna Carminati 78 vjeçare,rezidente në Casalpusterlengo. Italia ka marrë masa të jashtëzakonshme. Menjëherë kanë dalë urdhërat për të ndaluar hyrjen në zonat që konsiderohen si qendra të virusit. Në këto zona janë mobilizuar forcat e policisë dhe në rast nevoje,edhe ushtria. Rregullat e vendosura parashikojnë edhe sanksione penale për ata që i shkelin ato.

Janë ndaluar ekskursionet shkollore në Itali dhe jashtë saj, janë pezulluar manifestimet publike, përfshirë edhe ndeshjet e futbollit.

Shkollat janë mbyllur, dyqanet e muzetë. Këshilli i Ministrave në Itali ka miratuar një dekret me masa të forta me qëllim parandalimin e përhapjes së mëtejshme të koronavirusit kinez.

Bilanci botëror i koronavirusit është rritur në 2461 viktima. Rastet e konfirmuara që janë prekur me këtë virus janë 78 mijë e 766 mes të cilëve, 76 italianë. Ndërkohë, personat e shëruar janë 23 mijë e 133 persona.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.