Korridori VIII që nuk u bë realitet – Financime të shumta dhe bashkëpunime që nuk u finalizuan
Projekti i korridorit 8, është një projekt që zvarritet prej kohësh, dhe synon që të lidhë portin e Durrësit me atë të Varnës në Bullgari duke kaluar mes përmes Maqedonisë. Për këtë projekt kaq të rëndësishëm janë kërkuar dhe marrë shumë financime, janë nënshkruar shumë marrëveshje mes shteteve, të cilat nuk kanë prodhuar asnjë gjë konkrete dhe tashmë ndodhemi sërish në pikën zero.
Ideja për ndërtimin e këtij korridori ka nisur që në vitin 1994 me firmosjen e marrëveshjeve të para që i hapën rrugë studimit të fizibilitetit dhe thuajse tre dekada më pas ende nuk është bërë realitet. Korridori tetë, është një nga dhjetë “korridoret trans-europiane” të cilat janë konceptuar për të lehtësuar shkëmbimin e mallrave, njerëzve, naftës dhe furnizimeve me energji midis vendeve të BE-së, shteteve të Ballkanit që kanë dalje në Detin e Zi dhe Detin Kaspik dhe shteteve të Azisë Qendrore.
Sipas këndvështrimit evropian këto korridore do të kontribuojnë edhe në stabilitetin e një rajoni që ka qenë gjithmonë tepër i trazuar, veç anës ekonomike. Realizimi i kësaj vepre paraqet vështirësi të konsiderueshme. Trajektorja rrugore has dy pengesa madhore, përkatësisht ajo ndërmjet Shqipërisë dhe Maqedonisë dhe ajo midis Maqedonisë dhe Bullgarisë, të cilat gjenden në një terren malor dhe të vështirë. Korridori tetë do ta projektojë Shqipërinë drejt tregjeve të Evropës Lindore dhe më gjerë.
Ndërtimi i rrugëve, hekurudhave, porteve, logjistikës infrastrukturore dhe shërbimeve shtesë do të garantojë investime të mëdha të huaja. Gjatësia e Korridorit (Durrës – Varna) është gati 1100 km rrjet rrugor. Ndërsa rrjeti hekurudhor paraqet dy ndërprerje: në kufirin Shqipëri-Maqedoni (65 km) dhe Maqedoni-Bullgari (55 km). Me eliminimin e këtyre ndërprerjeve, gjatësia e rrjetit hekurudhor është gati 1200 km. Zvarritja e këtij projekti ka bërë që Ballkani të kthehet në rajonin më të varfër të Evropës.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.