Korrik, pronarët u dynden në gjykata! Agjencia e Trajtimit të Pronave: Kemi gati 687 dosje në pritje të tërhiqen nga qytetarët
Pas pezullimit thuajse të plotë gjatë muajve të pandemisë, qytetarët janë rikthyer në sportelet e Agjencisë së Trajtimit të Pronave gjatë muajve të verës. Sipas të dhënave zyrtare të Agjencisë, vetëm gjatë muajit korrik janë paraqitur nga qytetarët 46 kërkesa për tërheqje dosjesh, 14 aplikime për kompensim financiar si dhe 157 aplikime për kompensim për pronat e zëna nga ndërtimet informale. Agjencia ndërkohë njofton se ka në total 687 dosje të përgatitura në pritje për t’u tërhequr nga qytetarët.
Ajo që bie në sy nga të dhënat zyrtare të Agjencisë është numri shumë i lartë i proceseve gjyqësore ndaj saj. Vetëm gjatë muajit korrik, Agjencia raporton 99 padi ndaj saj për ndjekje në Gjykata. Ndërkohë përgjatë gjitha vitit 2020, arrin në rreth 500 numri i padive të reja nga ana e pronarëve ndaj Agjencisë së Trajtimit të Pronave.
Një numër shumë i madh padish të ngritura nga pronarët presin prej vitesh nëpër gjykata, veccanërisht në atë të Lartën. Ndërkohë që sipas parashikimeve, paditë do të vijojnë për shkak të shifrave shumë të larta që pretendojnë pronarët nga shteti. Vetëm Agjencia e Trajtimit të Pronave ka vlerësuar se se fatura financiare për kompensimin e pronarëve arrin në 101 miliardë lekë, afërisht 1 miliardë dollarë, ndërkohë që shoqatat e pronarëve pretendojnë një vlerë rreth 4 herë më të madhe. Deri në fund të vitit 2019 janë shqyrtuar në total mbi 26 mijë dosje pronarësh, ndërkohë që shifra prej 1 miliardë eurosh i korrespondon afërsisht 18 mijë vendimeve për kompensim.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.