Korrupsioni, sa dosje u mbyllën? 152 procedime në 2019, vetëm 34% e çështjeve shkuan në Gjykata, 65% u pushuan
Ndërsa vitin e shkuar u fol gjatë për korrupsionin e zyrtarëve publikë, në realitet kanë pësuar rënie të ndjeshme hetimet, procedimet ashtu si edhe dënimet për këtë vepër penale. Televizioni Scan disponon të dhënat e Prokurorisë së Përgjithshme lidhur me procedimet dhe dënimet për korrupsion gjatë vitit të shkuar, sipas të cilave, 34,52 % e çështjeve janë dërguar gjygjit dhe 65,48 % e çështjeve janë pushuar.
Gjatë vitit të shkuar, Prokuroritë në gjithë territorin kanë nisur 155 procedime për veprën e korrupsionit, afërisht 10% më pak nga një vit më parë kur numri i tyre ishte 172. Rëni9e ka shënuar si numri i të pandehurve të përfshirë në hetime, ashtu edhe i dënuarve me vendim gjykate, të cilët kanë qenë në total 68.
Për sa i përket gjendjes shoqërore nga të dhënat statistikore vihet re se të punësuar në sektorin shtetëror janë regjistruar 61,63 % e të pandehurve (ndër të cilët 9,43 % janë punonjës policie), në sektorin privat rezultojnë të punësuar 22,09 % e të pandehurve dhe 16,28 % prej tyre rezultojnë të papunë.
Korrupsioni pasiv i personave që ushtrojnë funksione publike përbën edhe peshën më të madhe te procedimeve për vitin e shkuar. Pesha specifike që zë kjo vepër penale në grupin e veprave penale të korrupsionit për vitin 2019 është 33,55 %, ndërsa për vitin 2018 ka qenë 43,02 % me 52 të proceduar, nga 72 në vitin 2018.
Numrin më të madh procedimeve të regjistruara edhe për këtë vepër penale e ka prokuroria pranë gjykatës së shkallës së parë Tiranë konkretisht, 13 procedime që përbëjnë 25 % të numrit total të procedimeve në shkallë vendi. Prokuroria pranë gjykatës së shkallës së parë Elbasan ka regjistruar 10 procedime ose 19 % të numrit total të procedimeve në shkallë vendi, prokuroria pranë gjykatës së shkallës së parë Vlorë ka regjistruar 7 procedime ose 13 % të numrit total të procedimeve, prokuroria pranë gjykatës së shkallës së parë Gjirokastër ka regjistruar 5 procedime ose 10 % të numrit total të procedimeve.
Lorenc Rabeta/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.