Korrupsioni, SPAK përgjoi 850 paisje në 2021 – Raporti: Hyrja në lojë e BKH rriti performancën, 1,500 persona u vunë nën mbikqyrje
Hetimet për veprat penale që lidhen me korrupsionin e zyrtarëve publikë duket se kanë zënë pjesën më të madhe të volumit të punës së SPAK për vitin 2021. Tendenca zbardhet nga numri i paisjeve e kompjuterave të vënë nën përgjim gjatë vitit të shkuar. Prokuroria e Posaçme bën me dije se në vitin 2021, pjesën më të madhe të procedimeve penale ku është kërkuar përgjimi, e kryesojnë ato të hetuara për veprën penale të korrupsionit me 67 proçedime penale/ ku janë përfshirë 850 pajisje fundore; më pas janë ato të hetuara për veprën penale të grupit të strukturuar kriminal në trafikimin e lëndëve narkotike me 45 procedime penale/ me 928 pajisje fundore.
Ndërkohë që në total janë rreth 2 mijë pajisje elektronike të vëna nën përgjim gjatë vitit 2021, të cilat u përkasin rreth 1,500 personave. Numri total i pajisjeve të vëna nën përgjim nga Prokuroria e Posaçme kundër Krimit të Organizuar e Korrupsionit rezulton me rreth 30% rritje krahasuar me një vit më parë.
SPAK e lidh këtë rritje të volumit të përgjimeve me hyrjen në skenë të oficerëve të Byrosë Kombëtare të Hetimit. Me datë 01.09.2021, 9 (nëntë) Oficerëve të Policisë Gjyqësore të Policë së Shtetit ju bashkohet grupi i pare i Hetuesve te Byrosë Kombëtare te Hetimit prej 7(shtate) hetuesish, duke zbutur ndjeshëm ngarkesën e punës, thekson SPAK në raport.
Rritje që reflektohet edhe në numrin e procedimeve e të dënimeve nga Prokoria e Posaccme gjatë vitit të shkuar. SPAK ka realizuar në total 675 procedime penale me 519 persona nën hetim për vitin e shkuar.
Janë dënuar me vendim të formës së prerë 171 të pandehur, nga të cilët : a. me burgim janë dënuar 114 persona. b. me kusht, kohë prove janë dënuar 40 persona. c. me orë pune janë dënuar 17 persona. “Gjatë vitit 2021, përvec deklarimit fajtor dhe masës së dënimit me burg apo me kohë prove, është dhënë dhe dënimi plotësues “ndalimi për të ushtruar funksion publik”, në bazë të nënit 35 të Kodit Penal për 13 persona.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.